Ambasadori i Mbretërisë së Bashkuar në Kosovë, Nicholas Abbott është shprehur i lumtur që sheh thirrje për zbatimin e Kushtetutës, si vendimin për tokat e Manastirit të Deçanit, ashtu edhe nenin 11 të saj, që lejon vetëm një valutë në vend.
“Jam shumë i lumtur kur shoh thirrje që të zbatohet kushtetuta e Kosovës, qoftë vendimi i Gjykatës Kushtetuese për tokat e Manastirit të Deçanit, qoftë neni 11”, shkroi Abbott në Facebook.
Abbott ka shtuar se nevojitet komunikim më i mirë për komunitet e prekura.
“Ajo që nevojitet është komunikimi më i mirë për komunitetet e prekura dhe zbatimi i inskenuar i masave për të lejuar njerëzit të rregullohen”, shtoi ai.
Reagimi i Abbott vjen pasi zëvendëskryeministri i Kosovës, Besnik Bislimi tha dje se Kushtetuta ose duhet të zbatohet në tërësi ose të mos zbatohet.
“Nuk ka logjikë në njërën rast të ketë insistim të bashkësisë ndërkombëtare që Kushtetuta të implementohet në tërësi siç është rasti i tokës për Manastirin e Deçanit, pastaj kur është puna te neni 11 i Kushtetutës që thotë se ka vetëm një monedhë në qarkullim në Kosovë të njëjtit miq të thonë po këtë mos e zbatoni…”, tha ai në një konferencë për media pas takimit me ministrin për Çështje Evropiane të Republikës Çeke, Martin Dvorak.
Banka Qendrore e Kosovës ka marrë vendim që nga shkurti të mos ketë transaksione me dinarët serbë në vend.
Neni 11 në Kushtetutë thotë se në Kosovë valuta e vetme e vlefshme është vetëm një.
“Neni 11 [Valuta] 1. Në Republikën e Kosovës si mjet i vlefshëm pagese përdoret një valutë e vetme. 2. Autoriteti Qendror Bankar i Kosovës është i pavarur dhe quhet Banka Qendrore e Republikës së Kosovës” thuhet në këtë nen.
