Ambasadori britanik në Kosovë, Nicholas Abbott, ka thënë se gjyqi i cili ka filluar sot ndaj ish-krerëve të UÇK-së është një sfidë morale.
Abbott ka thënë se as lufta e UÇK-së dhe as e Kosovës për liri nuk janë në gjyq dhe as nuk duhet të gjykohen.
Ai ka thënë se Kosova ka të drejtë të ketë guximin të ndjekë drejtësinë për viktimat e tjera, si dhe të zbatojë sundimin e ligjit për qytetarët.
“Ky gjyq ka të bëjë me veprimet e individëve. As lufta e UÇK-së dhe as e Kosovës për liri nuk janë në gjyq dhe as nuk duhet të gjykohen. Mbretëria e Bashkuar qëndron pranë ndërhyrjes së saj, si pjesë e NATO-s, si një kauzë e drejtë për të parandaluar një fatkeqësi humanitare dhe që të gjithë kosovarët të jetojnë të lirë nga represioni”, ka thënë Abbott përmes një postimi në Facebook.
Ai ka thënë se Mbretëria e Bashkuar mbetet e përkushtuar për arritjen e drejtësisë për të gjitha viktimat e krimeve të luftës dhe krimeve kundër njerëzimit. /teve1.info/
