Aleanca për Ardhmërinë e Kosovës (AAK) ka mbajtur sot mbledhjen e Këshillit të Përgjithshëm, ku janë marrë disa vendime të rëndësishme për rrugëtimin politik të partisë në prag të zgjedhjeve parlamentare.
Sipas njoftimit zyrtar, gjatë takimit, Këshilli i Përgjithshëm ka aprovuar me shumicë votash Ardian Gjini si bartës të listës dhe mandatar për udhëheqjen e qeverisë së ardhshme pas zgjedhjeve.
Po ashtu, është miratuar edhe lista e kandidatëve për deputetë për zgjedhjet e ardhshme parlamentare.
“Kjo listë reflekton unitetin e Aleancës, duke gërshetuar përvojën politike me prurjet e reja profesionale, me synimin e vetëm: shërbimin ndaj qytetarëve dhe forcimin e shtetit të Kosovës”, thuhet në njoftim.
Një tjetër pikë e rëndësishme e mbledhjes ishte aprovimi i ndryshimeve statutare, të cilat, sipas partisë, synojnë ta bëjnë Aleancën më dinamike, transparente dhe më të hapur ndaj proceseve demokratike të brendshme.
Këto ndryshime i paraprijnë Kuvendit Zgjedhor të AAK-së, i cili do të mbahet më 24 maj.
Në mbledhje, kryetari i AAK-së, Ramush Haradinaj, bashkë me anëtarët e Këshillit, diskutoi edhe për mobilizimin e degëve në prag të zgjedhjeve të jashtëzakonshme.
AAK ka deklaruar se hyn në këtë proces zgjedhor me fokus në zhvillimin ekonomik, sigurinë kombëtare dhe integrimet euro-atlantike, duke u zotuar se do t’u ofrojë qytetarëve një alternativë të qëndrueshme për qeverisjen e vendit./teve1.info/
