Në Qendrën Mediale në Çagllavicë, të martën u mbajt një panel me temën “Dezinformimi dhe lajmet e rreme në fushatat zgjedhore – si të mbrohen votuesit dhe të ruhet procesi demokratik”.
Në diskutime mori pjesë edhe ambasadori i Francës në Kosovë, Olivier Guerot, i cili ngriti shqetësimin se vitet e fundit është shtuar ndjeshëm shpërndarja e lajmeve të rreme.
“Është e domosdoshme të zhvillojmë mendimin kritik, në mënyrë që të mos bëhemi pre e lajmeve të rreme. Kemi parë raste kur ato shpërndahen në mënyrë të organizuar, nga persona të specializuar në këtë fushë. Franca tashmë ka krijuar disa mekanizma për t’i përballuar”, deklaroi Guerot.
Për këtë fenomen u shpreh e shqetësuar edhe kryeredaktorja e portalit serb Kossev, Tatjana Lazareviq.
Ajo theksoi se propaganda politike, sidomos nga liderë që shmangin gazetarët, është shndërruar në problem serioz.
“Gazetaria globalisht është një profesion në rrezik. Sot sfida kryesore është propaganda, e cila nuk mund të luftohet lehtësisht nga mediet e vogla, ndërsa mungon edhe vullneti i gazetarëve. Për më tepër, politikanët prodhojnë vetë propagandë përmes faqeve të tyre, duke refuzuar ballafaqimin me mediet dhe publikun”, tha Lazareviq.
Ndërkohë, hulumtuesi nga platforma Hibrid.info, Festim Rizanaj, solli disa shembuj të ndikimit të jashtëm, ku përfaqësues të lartë politik nga Serbia kanë tentuar të orientojnë komunitetin serb në Kosovë për ta votuar Listën Serbe.
“Deri më tani është vërejtur se synohet orientimi i votës së komunitetit serb nga Serbia. Dy deklarata lidhen drejtpërdrejt me këtë çështje: Millosh Vuçeviq, kryetar i Partisë Progresive Serbe dhe këshilltar i presidentit Vuçiq, e cilësoi votimin e Listës Serbe si dëshmi të fuqisë legjitime të serbëve. Edhe Arno Gujon, drejtor i Zyrës për Diplomaci Publike dhe Kulturore, u shpreh se Lista Serbe është garanci që zëri i serbëve do të dëgjohet”, tregoi Rizanaj.
Në fund, ambasadori Guerot përmendi edhe projektin Shared Horizon, i cili përfshin tërë Ballkanin Perëndimor dhe synon të forcojë gazetarinë e pavarur. Ky projekt sjell bashkë gazetarë që flasin shqip e serbisht, duke nxitur të mësuarit e gjuhës së njëri-tjetrit dhe duke ruajtur karakterin multietnik të rajonit.
