Katër palë zgjedhje gjatë vitit 2025 mund të mos mjaftojnë.
Edhe për këtë vit, nuk përjashtohet mundësia që qytetarët e vendit të iu drejtohen kutive të votimit.
Kështu tha kryeministri në detyrë, Albin Kurti kur foli për çështjen e zgjedhjes e Presidentit.
“Nëse nuk arrijmë ta zgjedhim presidentin, ose ta rizgjedhim presidenten, e afati i fundit për këtë gjë është 4 marsi, nëse nuk e kemi të kaluar paraprakisht buxhetin për vitin 2026, ne as nuk mund të mbajmë zgjedhje të reja. Se natyrisht ekziston mundësia, jo vetëm teorike, por edhe praktike, që ne të shkojmë prapë në zgjedhje, në rast se nuk arrijmë ta rizgjedhim presidenten”, u shpreh Kurti.
E zëdhënësi i Lëvizjes Vetëvendosje, Arlind Manxhuka thotë se opozita nuk mund të na bllokoj përgjatë këtij viti.
“Opozita nuk mund të na bllokojë më për formimin e Qeverisë Kurti 3, siç bëri përgjatë vitit 2025. 28 dhjetori ishte përgjigja popullore. Megjithëkëtë, për 80 veta në sallë para 4 marsit 2026 duhet që edhe së paku mbi 15 deputetë opozitarë të qëndrojnë në sallë. Këtë nuk mund ta dimë tash”, ka thënë Manxhuka për Tëvë1.
Mirëpo, për çështjen e votimit ose jo të kandidates për Presidente, akoma nuk kanë diskutuar brenda Partisë Demokratike të Kosovës.
Kandidati për deputet nga kjo parti, Nait Hasani, thotë se është ende herët për këtë qëndrim.
Televizioni ka tentuar të marrë edhe një qëndrim nga zyrtarë brenda LDK-së dhe AAK-së, mirëpo ata nuk kanë treguar se si do të veprojnë.
E deri sa t’i vie radha çështjes së Presidentes, Kurti deklaroi gjatë së dielës se fillimisht duhet të kalohet buxheti, si dhe të votohen marrëveshjet ndërkombëtare.
