Për disa seanca rresht u tentua të zgjidhej nënkryetari nga komuniteti serb.
Asnjëri prej tyre nuk arriti votat e mjaftueshme, por kjo nuk e ndaloi kryekuvendarin, Dimal Basha, që të konstatojë se Kuvendi është konstituar.
Një konstatim i tillë, po konsiderohet se tejkalon praktikat parlamentare dhe kushtetuese.
Sipas Vullnet Bugaqku nga KDI, faza e konstituimit të Kuvendit është e përmbyllur vetëm atëherë kur të jenë zgjedhur të gjithë nënkryetarët e Kuvendit.
“Praktika e deritanishme parlamentare në Kosovë, por edhe jurisprudenca e deritanishme e Gjykatës Kushtetuese, na kanë bërë të qartë që është obligim kushtetues me u konstitu Kuvendi brenda një afati të caktuar, dhe rrjedhimisht brenda këtij afati m’i përfundu zgjedhjen e kryetarit dhe të gjithë nënkryetarëve të Kuvendit. Prandaj, mendoj se juridikisht në kuptimin formal kushtetues nuk kemi ende Kuvend të konstituar dhe rrjedhimisht, nuk mund të rrjedhin as afatet për çështjen e caktimit të mandatarit për çështjen e formimit të Qeverisë”, thotë Vullnet Bugaqku nga KDI.
Në anën tjetër sipas Mazllum Baraliu, duhet të pritet vendimi i Kushtetueses, për të parë nëse moszgjedhja e një nënkryetari bllokon konstituimin e Kuvendit apo jo.
“Jo vetëm orientuese, por edhe kufizuese për të gjithë. Për t’iu treguar këtyre njerëzve që nuk marrin vesh ose nuk dojnë ta kuptojnë se asnjëherë vendimin e Gjykatës Kushtetuese, që vendimet e tilla janë obligative për t’u zbatuar dhe kur miratohen e hyjnë në fuqi, janë pjesë e Kushtetutës, që ta kuptojnë që duhet ta konstituojnë Kuvendin. Ose nëse është i konstituar, atëherë Gjykata thotë se është i konstituar, kurse nëse s’është i konstituar duhet të përsëritet eventualisht ajo pjesa e dy nënkryetarëve të komuniteteve pakicë, ose të këtij të fundit që nuk është zgjedhur”, shprehet profesori universitar, Mazllum Baraliu.
Në Gjykatën Kushtetuese, të shtunën është dërguar një lëndë nga Lista Serbe sa i përket mënyrës së votimit të kandidatëve nga komuniteti pakicë për nënkryetar të Kuvendit.
Ndërkohë, Presidenca të hënën deklaroi se janë duke shqyrtuar nëse Kuvendi mund të konsiderohet si i konstituar pa zgjedhjen e plotë të nënkryetarëve të Kuvendit.
Për këtë punë, Presidentja Vjosa Osmani tashmë ka autorizuar zyrën e saj ligjore për një analizë.
