Kryetari i Lidhjes Arabe, Ahmed Aboul Gheit, dënoi sulmet izraelite ndaj Libanit, duke e akuzuar Izraelin për “kërkim të vazhdueshëm për të sabotuar” marrëveshjen e armëpushimit midis SHBA-së dhe Iranit.
Aboul Gheit tha në një deklaratë të postuar në platformën sociale X se sulmet “barbare” të ushtrisë izraelite ndaj Libanit shkelin ligjin ndërkombëtar, duke shtuar se Izraeli “vazhdon të luajë një rol pengues për çdo mirëkuptim që mund të kontribuojë në rivendosjen e stabilitetit” në rajon.
Ai gjithashtu i bëri thirrje bashkësisë ndërkombëtare të ushtrojë presion mbi Izraelin që të ndalojë menjëherë sulmet e tij ndaj Libanit, shkruan AP.
Izraeli ka intensifikuar sot sulmet ndaj Libanit duke bombarduar në gjithë vendin, me Iranin që ka kërcënuar të tërhiqet nga marrëveshja e armëpushimit nëse këto sulme nuk ndalen.
