Fatmir Haxholli nga Zyra ndërlidhëse e Kosovës në Serbi ka njoftuar se, autoritetet kufitare të Serbisë, në pikëkalimin ‘Batrovci’, Serbi – Kroaci, nga mesnata po i mbajnë të bllokuar së paku katër autobus me targa dhe udhëtarë, qytetarë të Republikës së Kosovës.
Një qytetar i cili është ndaluar në pikën kufitare Serbi-Kroaci, ka thënë për TËVË1 se nga ora 04:00 e mëngjesit është ndaluar dhe nuk është në dijeni për arsyen e ndalimit.
I pyetur nga gazetari për Tëvë1, ai u shpreh se disa persona e kanë marrë dhe e kanë shoqëruar në dhomat e policisë në kufij, të cilët ia kanë marrë dokumentet.
“Kush jeni, se çka punoni, a keni pasur dikë në UÇK, dhe i kanë marrë deri në dy herë, tri herë të njëjtit persona, e kanë listën dmth me listë kanë ardhur dhe na kanë marrë, kështu tashmë, jemi duke pritur nuk e di. Unë personalisht jam prej orës 4 të mëngjesit dhe na kanë ndaluar nuk po e dimë arsyen e ndalimit këtu, disa persona na kanë marrë dhe na kanë shoqëruar në dhomat e policisë aty ku janë në kufij, na kanë marrë në pyetje edhe nga po vjen dhe ku po shkon dhe na kanë liruar, dokumentet janë atje”, tha ai.
Tutje ai ka shtuar se është me veturën e tij, dhe se 17 persona janë intervistuar, duke deklaruar se nga tre persona nga një autobus i kanë marrë për intervistë.
Përderisa tha se policët u kanë bërë kërkesë qytetarëve ata të cilët janë intervistuar, me u ndaluar.
“Janë thujse rreth 17 persona që janë intervistuar që i kanë marrë nuk e di saktësisht ndoshta ka edhe më shumë, unë personalisht nuk jam me autobus, por me veturë por ka që i kanë marrë nga dy tri persona nga një autobus, dmth njëri prej tyre jam dhe unë. Ka dhe vetura me tabela të RKS që nuk kanë dokumente dmth shteteve evropiane të cilat i ndalojnë këtu. Tani kanë ardhur katër policë me një listë dhe e kanë bërë një kërkesë që nëse dëshirojnë për të shkuar të tjerët ata të cilët nuk janë intervistuar, mundemi me i liru por ata që janë intervistuar duhet me i ndaluar” shtoi ai.
Qytetari u shpreh se arsyeja e ndalimit është për shkak të votimit për asamblenë parlamentare.
“Kështu që shoferët kanë bërë marrëveshje mes vete që mos me u largu asnjë prej këtyre, Sipas informative që po bëhen, ndalimi është bërë për shkak votimit që është bërë në asamblenë parlamentare”, u shpreh qytetari./teve1.info/