Kompanitë kosovare po i shfrytëzojnë hapësirat e këtyre ndërtimeve edhe për reklamimin e bizneseve të tyre, në rrugët ku qytetarët e Kosovës i frekuentojnë me intensitet të lartë.
Kryesisht në rrugët Regjionale, por dhe ato Nacionale, numri i reklamave që shfrytëzohen nga bizneset vendore është shumë i madh dhe jo pak herë, ato janë komentuar në forma të ndryshme se duhet apo nuk duhet lejuar.
Telenews.al për këtë çështje të ndjeshme ka kontaktuar edhe me Ministrinë e Infrastrukturës, ku nëpërmjet një emaili, ka kërkuar sqarime shtesë, derisa përgjigjja e tyre ka qenë e shkurtër.
”Ju informojmë se një kompani e posedon pëlqimin për vendosjen e panove reklamuese, në të gjitha rrugët Regjionale dhe Nacionale në të cilën i lejohet vendosja e panove në mbikalime ura dhe tunele deri me datën 25.09.2022”, thuhet në përgjigjjen elektronike të Ministrisë së Infrastrukturës.
Nga Telenews.al është kërkuar të dihet se si është vepruar me lejen për pëlqimin e vendosjes së reklamave në këto rrugë, ka qenë kërkesë specifike e ndonjë kompanie dhe pas interesimit është hapur ndonjë tender/thirrje publike, apo si ka rrjedhur çështja, por kjo pyetje nuk ka marrë përgjigjje.
Në opinion shumëherë është diskutuar për ligjshmërinë e vendosjes së këtyre reklamave, madje shumë shoferë kanë shprehur brengat e tyre se ato ndikojnë negativisht tek ta, por që organet përgjegjëse nuk i morën parasysh asnjëherë kritikat dhe ato vazhdojnë të mbeten nëpër rrugët kryesore të vendit.
Deri tash, dihet se nuk ka ndonjë plan adekuat për reklamat e vendosura në vendet publike, jo vetëm për kryeqytetin, por edhe nëpër të gjitha rrugët e vendit, ku në shumicën e rasteve thuhet se ato janë pa leje, por edhe pa projekte të definuara, madje disa prej tyre janë edhe të rrezikshme për kalimtarët.
Se a do te ndërmerret diçka konkrete ditëve në vijim apo do të vazhdojë kjo gjendje jo fortë e këndshme, le të mbetet nën-përgjegjësinë e institucioneve përkatëse shtetëore, për të siguruar rend dhe siguri për qytetarët dhe të gjithë frekuentuesit e rrugëve.
