Përplasja fizike mes kryetarit Lladrovci e Rahimaj dje në mbledhjen e bordit të AKK-së u tha se u bë pasi LVV kërkuan regjistrimin e tri komuave veriore sepse ato nuk figurojnë në raportin e anëtarësisë. Mirëpo kjo u mohua nga kryetarët e komunave veriore dhe AKK ku kjo e fundit publikoi edhe disa fatura.
Kundërshtimi eskaloi deri në përleshje fizike.
Po mbahej mbledhja e Bordit të Asociacionit të Komunave.
Kryetarët që vijnë nga Lëvizja Vetëvendosje penguan punimet e kësaj mbledhje të enjten për disa kërkesa.
Një ndër to ishte regjistrimi i tri komunave veriore, pasi sipas tyre kjo ende nuk është bërë.
“Kërkesën që e kemi bërë të radhës që në shtator të vitit të kaluar për anëtarësimin e tre komunave të veriut të bëhet pjesë e rendit të ditës dhe kjo të miratohet. Po ashtu plotësimin e bordit të Asociacionit me një anëtar në këtë rast nga Lëvizja Vetëvendosje”, ka thënë kryetari i Shtimës, Qemajl Aliu.
“Për hir të informimit të drejtë të qytetarëve, si Kryetar i Asociacionit të Komunave të Kosovës, njoftoj se katër komunat veriore janë pjesë e Asociacionit të Komunave të Kosovës, tre prej tyre janë pjesë qysh më herët e së fundmi, pjesë e saj është edhe Komuna e Mitrovicës së Veriut, ku paguajnë gjithashtu anëtarësinë në AKK, andaj çdo përpjekje për ta mohuar e shtrembëruar këtë fakt, paraqet propagandë, shpifje të ulët, që nuk i kontribuon asgjë interesit të qytetarëve.”, ka thënë Aliu.
Po ashtu, Aliu publikoi edhe disa fatura ku shihen se tashmë komunat veriore po i paguajnë në mënyrë të rregullt pagesat për anëtarësi.
Derisa edhe kryetari i Zveçanit për tëvë1 ka treguar se janë të anëtarësuar që nga shtatori i vitit të kaluar.
“Të gjithë e dijmë se unë vazhdimisht kam marrë pjesë si kryetar komune. Çdo takim që kemi pasë dhe çdo thirrje e cila është bërë nga Komunat e Republikës së Kosovës vazhdimisht kanë marrë pjesë edhe drejtorët edhe zyrtarët komunalë të kësaj Komune.” ka thënë Ilir Peci.
Këtë e konfirmoi edhe i pari i Zubin Pokut ku tha se kjo komunë ka qenë pjesë e AKK-së edhe para se ai të zgjidhej kryetar.
“Edhe për takimin e djeshëm dhe të gjitha takimet tjera jam i ftuar. Dje për fat të keq nuk munda të marr pjesë meqenëse e kishim një agjendë në Komunë ku u hapën zyrat e punësimit dhe patëm delegacion të Agjencisë së Punësimit të Kosovës dhe natyrisht prej drejtorit regjional ishim në vizitë për shkak se i hapëm disa zyre të punësimit në Komunë”, tha Izmir Zeqiri.
Nga Asociacioni i Komunave të Kosovës kanë thënë për tëvë1 se shumë shpejt do të dalin me dokumente dhe fakte kundër deklaratave të LVV-së.
