Bashkimi Europian po rishikon objektivin për ndalimin e plotë të shitjes së makinave të reja me motorë me djegie të brendshme deri në vitin 2035. Komisioni Europian ka propozuar që, në vend të një reduktimi 100% të emetimeve, prodhuesit e automjeteve të detyrohen të arrijnë një ulje prej 90% krahasuar me nivelet e vitit 2021.
Ky propozim vjen si përgjigje ndaj presionit të vazhdueshëm nga industria automobilistike dhe shënon një zbutje të një prej masave kyçe të “Marrëveshjes së Gjelbër Europiane”, e cila synon neutralitetin klimatik deri në vitin 2050. Vendimi ende duhet të miratohet nga Parlamenti Europian dhe shtetet anëtare.
Sipas ekonomistit Bernard Jullien, specialist i industrisë automobilistike, kjo lëvizje është më tepër e lidhur me zhvillimet politike sesa me nevojat reale të tregut. Ai paralajmëron se zbutja e objektivit mund të dobësojë tranzicionin drejt elektromobilitetit dhe të dekurajojë investimet në automjetet elektrike.
Ekspertët theksojnë se problemi kryesor i makinave elektrike mbetet çmimi i lartë, ndërsa kërkesa e konsumatorëve do të rritej ndjeshëm nëse automjetet elektrike do të bëheshin më të përballueshme. Ndërkohë, disa prodhues të mëdhenj si Ford dhe Porsche kanë rishikuar planet e tyre për elektrifikim të plotë.
Në të njëjtën kohë, Kina vazhdon të avancojë me shpejtësi në sektorin e automjeteve elektrike dhe të baterive. Sipas analistëve, lehtësimi i politikave europiane rrezikon ta lërë industrinë automobilistike të BE-së prapa konkurrencës kineze dhe mund të favorizojë indirekt importet nga tregu kinez./albinfo.ch
