Është njëra prej datave më të rëndësishme në historinë e shtetit më të ri në Evropë.
Për Ditën e Çlirimit të Kosovës, organizohen aktivitete të shumta në nivel qendror e lokal për të kujtuar përfundimin e kohës së okupimit serb dhe fillimin e periudhës së paqes.
Mirëpo, 12 qershori, nuk është në listën e festave zyrtare.
Kjo është zhgënjyese për kategoritë e dala nga lufta.
“Kjo tregon se sa shumë u paska pasë munguar liria, zyrtarëve tonë në Kosovë. Do të thotë pas 25 viteve ende nuk është zyrtarizuar Dita e Çlirimit të Kosovës, është e pabesueshme. Kurse, ne e festojmë Ditën e Evropës, pa qenë fare në Evropë”, thotë Ahmet Grajçevci nga Këshilli Koordinues i Familjarëve të të pagjeturëve.
Përpos si domosdoshmëri që Dita e Çlirimit të jetë festë zyrtare, si mjaftë e rëndësishme llogaritet të jetë përcaktimi i ditës që do të konsiderohej si ditë e çlirimit.
“Saktësisht duhet të konsiderohet edhe koha, data dhe cila ditë. 12 qershori nuk është dita e Çlirimit, pasi trupat e fundit janë larguar nga vendi ynë më 20 qershor. Dhe zakonisht në vendimi në çdo vend merret në ditën kur largohen trupat e fundit nga territori i atij vendi, largohen të mundur ose të pushtuar. Ajo konsiderohet Dita e Çlirimit, pra duhet saktësuar se cila datë është Dita e Çlirimit”, thotë Tomor Avdia, njohës i protokolit.
Televizioni ka tentuar të marrë qëndrim nga Qeveria e Kosovës, nëse ka ndonjë nismë që të bëhet një gjë e tillë, por nuk ka marrë përgjigje.
Më 12 qershor të vitit 1999 trupat britanike të NATO-s hyn në kryeqytet, e cila shënon edhe Ditën e Çlirimit.
