Sot është dita e fundit e procesit të regjistrimit të popullsisë, ekonomive familjare dhe banesave që filloi më 5 prill.
Agjencia e Statistikave të Kosovës (ASK) njoftoi se në kuadër të procesit, deri më 13 maj janë regjistruar mbi 1,4 milionë banorë rezidentë në Kosovë.
E në lidhje me kërkesën për shtyrjen e afatit për regjistrim të popullsisë, drejtori i ASK-së, Avni Kastrati tha se vendos Qeveria e Kosovës.
“Nuk e di, nuk vendoset nga ne, por nga Qeveria. Jemi në një takim në ASK-së që po e mbajmë me zyrtarë tanë, nuk jemi me Qeverinë. E kemi bërë gjashtë javë nga dy javë që ka qenë, qytetarët e kanë obligim me qenë të vëmendshëm…Regjistrohen ata, e kanë për detyrë, me u regjistru”, tha Kastrati.
Tutje, ai tha se janë duke i shqyrtuar ankesat dhe do të dalin me një njoftim.
Teve1 ka dërguar pyetje edhe në drejtim të Qeverisë së Kosovës dhe të njëjtit ende nuk kanë kthyer përgjigje.
Nga ana tjetër Ylli Shala, menaxher i projektit në Agjencinë e Statistikave tha se rënia e natalitetit dhe migrimi janë dy faktorët kryesor që kanë ndikuar në rënien e numrit të popullsisë, por që sipas tij në Kosovë nuk ka shumë rënie të numrit të banorëve.
Ndërsa sipas Ligjit për regjistrimin e popullsisë, ekonomive familjare dhe banesave, çdo person mund të gjobitet nga 30 deri në 2 mijë euro, nëse refuzon t’i japë informacionet e kërkuara nga regjistruesi.
Në procesin e regjistrimit në vitin 2011 Kosova pati rreth 1,8 milionë banorë.
