Kurti këto deklarime i bëri në hapje të Samitit të parë Rajonal për Mbrojtje nga Diskriminimi Racor që po mbahet në Prishtinë, derisa shtoi se ky samit ka për qëllim krijimin e një praktike të mbledhjes së akterëve kryesor se si vendet e Ballkanit Perëndimor mund të luftojnë diskriminimin e komuniteteve rom, ashkali dhe egjiptian në mënyrë që të rritet cilësia e jetës së tyre.
“Krahas ndërgjegjësimit institucional na duhet edhe pune e përbashkët me qytetarë, përgjegjësia qytetare dhe vetëdijesimi shoqëror. Do të dëgjojmë shembuj të mirë që do të qojnë përpara zhvillime pozitive të mbrojtjes, promovimit dhe zhvillim të të drejtave të komuniteteve duke e ditur se gjendja e tyre nuk është e mirë si nga niveli i diskriminimit ashtu edhe ai i varfërisë”, tha Kurti.
Ai premtoi se si kryeministër i të gjithë qytetarëve të Kosovës, pa dallim përkatësie etnike, feje e prejardhje do të angazhohet për të gjithë, por tha se do të angazhohet më së shumti për ata që kanë nevojë.
“Institucionet mbeten të përkushtuara dhe angazhuara për të formuar ndjesi të barabarta duke ofruar arsim e shëndetësi njësoj, e pa dallim, sepse shoqëritë janë të forta kur kujdesemi për më të dobëtit”, tha Kurti.
Kurti tregoi se Qeveria i ka ndarë 600 bursa universitare për qytetarët e komunitetit RAE, prej tyre 100 vetëm për Fakultetin e Edukimit.
“100 bursa për nxënës të komuniteteve rom, ashkali dhe egjiptian për studime në Fakultet të Edukimit në mënyrë që në të ardhmen e afërt në klasat tona të mund të kemi mësues që mund të japin mësime për nxënësit e të gjitha komuniteteve në Kosovë. Gjithashtu 500 bursa në drejtime tjera të studimeve”, tha Kurti.
Ai tha se një pjesë e konsiderueshme diskriminimit ndodh e përsëritet sepse nuk raportohet, lihet në heshtje.
Në samit po marrin pjesë anëtarë nga Shqipëria, Mali i Zi e Maqedonia.
