SHBA e BE janë shprehur të zhgënjyera me Qeverinë e Kosovës, pasi që nuk kishte përfillur kërkesat për shtyrjen e zbatimit të vendimit edhe për 10 muaj.
Në reagimet brenda vendit, krahas opozitës që edhe deputeti i Lëvizjes Vetëvendosje, Haki Abazi thotë se Qeveria duhet t’i marrë në konsideratë kërkesat ndërkombëtare.
“A duhet të kemi fleksibilitet më të mëdha në këtë çështje unë mendoj që po, sepse nuk është çështja më e rëndësishme çështja e targave. Është çështje e rëndësishme çështja e zbatimit të ligjit mirëpo për 20 vite ky zbatim i ligjit shpeshherë është bërë pjesë e negociatave dhe dialogut me bashkësinë ndërkombëtare duke tentuar që të ruhet stabiliteti dhe siguria në Ballkan. Prap them që agjenda e madhe për ne është që të shihet qartazi kush është kundër integrimit evropian, kush është kundër fqinjësisë së mirë, jemi shumë afër për ta rrumbullakuar gjithë qarkun që Serbia të jetë ajo që qartazi e ka sabotuar edhe dialogun edhe procesin integrues”, tha Abazi.
Edhe njohësi i çështjeve politike Gazmir Raci thotë se Qeveria duhet ta rishqyrtojë vendimin për targat.
Deri më datën 21 nëntor vendimi do të jetë në fazën e qortimit dhe pas kësaj date do të kalohet në fazën e dënimit të qytetarëve të cilët bartin targat ilegale.
Kronika e gazetarit Valmir Gallopeni.
