Nën drejtimin e trajnerit Mikel Arteta, duket se Arsenal ka “rilindur” dhe në këtë sezon “Topçinjtë” kanë fituar tetë nga nëntë ndeshjet e para në Premier League duke udhëhequr kampionatin ndërsa “hedhin” kështu kandidaturën për të rivalizuar Manchester Cityn për titullin kampion.
Kur të gjithë po i “thurin” elozhe Arsenalit dhe Artetas, ai që del kundër “rrymës” është një ish-lojtar i londinezëve. Fjala është për Pierre-Emerick Aubamenyang i cili kritikon teknikun spanjoll për marrëdhënien me lojtarët veteran ndërsa shton se Arteta preferon vetëm lojtarë të rinj të cilët mund t’i urdhërojë lehtësisht.
“Arteta ka një problem, nuk mund të menaxhoj lojtarë të mëdhenj, apo futbollistë që kanë shumë karakter. Ai ka nevojë për ata lojtarët e rinj të cilët nuk e kundërshtojnë kurrë për asgjë, lojtarë të cilët thjesht e dëgjojnë”, u shpreh Aubameyang.
Sakaq, edhe vetë Arteta në të kaluarën e ka pranuar se marrëdhënia me lojtarin gabonez nuk ka qenë ndër më të mirat duke theksuar se palët nuk i besonin më njëra-tjetrës.
