Sekretari gjeneral i FIBA Botës, Andreas Zagklis, ka nisur vizitën e tij në Kosovë, ku do të qëndrojë edhe gjatë ditës së nesërme, ka njoftuar Federata e Basketbollit të Kosovës (FBK).
Zagklis, fillimisht e ka nisur vizitën e tij në zyrat e FBK-së, ku është takuar me drejtuesit e kësaj federate, kryetarin Arben Fetahu dhe sekretaren e përgjithshme Elvira Dushkun. Ai është njoftuar me stafin e FBK-së dhe ka vëzhguar nga afër punën që bëhet.
Ai është ndarë i kënaqur me pritjen që i është bërë dhe ka shtuar se ndihet i nderuar që po e viziton Kosovën.
“Ky është vit jubilar, pasi është 90 vjetori i themelimit të FIBA-s, ku po zhvillohen shumë aktivitete në mbarë botën dhe jam shumë i lumtur që sot gjendem në mesin tuaj. Federata e Basketbollit e Kosovës edhe pse është pranuar që një kohë të shkurtër, është ndër më aktivet me ngjarje dhe organizime. Ju dëshiroj shumë suksese për të ardhmen”, ka thënë Zagklis.
Ai gjithashtu gjatë ditës së sotme do ta ketë edhe një takim me drejtuesit e Komitetit Olimpik të Kosovës (KOK), si dhe do ta shohë nga afër finalen e Superkupës Mbarëkombëtare që luhet në mbrëmje mes Trepçës dhe Tiranës në Mitrovicë.
Ndërsa, gjatë paradites së nesërme, Zagklis do të pritet nga kryetari i Komunës së Prishtinës, Përparim Rama dhe ministri i Kulturës, Rinisë dhe Sportit, Hajrulla Çeku.
