Sipas një komunikate për medie, ai tha se po shënohet fillimi i një ndërmarrje të re prodhuese dhe një investimi të ri.
“Pikërisht ajo që i duhet ekonomisë tonë. Prodhim, investim. Investim në prodhim”, u shpreh kryeministri.
Sipas komunikatës, Kurti me shembuj nga pandemia COVID19, ka treguar edhe për rëndësinë e letrës dhe gotave të cilët prodhohen nga ky produkt.
“E sot po përurojmë hapjen e një fabrike të prodhimit të gotave prej letre. Vlera investive kalon shifrën mbi një milion euro me synim të rritjes së potencialit prodhues në të ardhmen.
Pandemia ndër të tjera na pati shpërfaqur një defekt serioz të ekonomisë tonë; varësinë nga importi, dhe mungesën e prodhimtarisë vendore, por sikurse ndërmarrësit që shohin shansin në vështirësi edhe qeveritë duhen që në kriza si ajo e pandemisë të shohin mundësi për reforma”, thuhet në komunikatën e lëshuar nga Zyra e Kryeministrit.
Ai theksoi se që atëherë fokusi i Qeverisë është riorientimi i ekonomisë në drejtim të prodhimtarisë vendore, ndërkaq që listoi edhe masat mbështetëse për bizneset në kuadër të Pakos së Ringjalljes Ekonomike.
