Arsyetimin e projektligjit në mbledhjen e të mërkurës e dha ministrja e Industrisë, Ndërmarrësisë dhe Tregtisë, Rozeta Hajdari.
Para anëtarëve të komisionit, Hajdari tha se nevoja për këtë projektligj është mbrojtja e shëndetit dhe sigurisë së konsumatorëve.
“Sa i përket sigurisë së produkteve, arsyeja kryesore për rregullimin e kësaj fushe përmes këtij projektligji është sigurimi i një niveli më të lartë të mbrojtjes së shëndetit dhe sigurisë së konsumatorëve që përdorin produktet, si dhe përdoruesve të tjerë që përdorin produktet për nevoja të tyre në kryerjen e veprimtarive të tyre profesionale. Rrjedhimisht do të sigurojë vendosjen në treg të produkteve ekskluzivisht të sigurta dhe do të parandalojë prodhimin, importin dhe eksportin të produkteve mashtruese”, tha ajo.
Ndërsa, e pyetur nga kryetari i komisionit, Ferat Shala, nëse ka ndonjë analizë që ministria ka bërë në raport me ligjin që ka qenë në fuqi dhe cilat do të jenë përparësitë e ligjit të ri, ministrja Hajdari tha se pas një analize të bërë nga MINT, janë vërejtur shumë parregullsi të vendosjes së produkteve në treg. Andaj, ka qenë e nevojshme të plotësohet legjislacioni në fuqi.
“Në tërësi pas një analize të mirëfilltë dhe krijimit të koncept dokumentit janë vërejtur shumë parregullsi të vendosjes së produkteve të treg që kanë sjell në vështirësi edhe identifikimin e rrezikshmërisë së produktit dhe kanë cenuar sigurinë publike të konsumatorëve”, tha ajo.
Krahas kësaj, ministrja Hajdari tha se ky Projektligj është harmonizuar me Ligjin për kundërvajtje. Votën pro këtij projektligji e dhanë edhe anëtarët e komisionit nga radhët e opozitës. /KP/
