Punës që nisi të shtunën, iu gëzuan shumë.
Edhe mjetet vet i siguruan.
Është ky ekipi radios “Kosova e Lirë” të cilët në kohën e luftës e raportonin çdo krim serb në Kosovë.
Këta morën lajmin se një mërgimtar nga Zvicra, ka dhuruar një donacion për ta rinovuar bunkerin që shërbeu si radio gjatë luftës.
Por, për të arritur deri tek ky bunker, fillimisht duhet të zgjerohet rruga në distancë prej 2 kilometrave, nga fshati Berishë tek Maja e Pallanikut.
Për ta bërë këtë, vullnetar u paraqit Mentor Hoti me kompaninë e tij.
Në vitin 1999, si 18 vjeçar, vet Hoti kishte ndihmuar në bartjen e pajisjeve të radios për tek bunkeri.
Këto rrugë nuk i ka harruar as pas 23 vjetëve.
Por, ekipi i radios u dëshpërua kur arritën tek Maja e Pallanikut.
Këta panë se bunkeri në të cilin kishin raportuar gjatë luftës është lënë në këtë gjendje nga institucionet vendore.
Megjithëkëtë, shprehen se i janë gëzuar lajmit për rindërtimin e tij.
“Të them të drejtën I jam gëzuar lajmit…”, thotë Martin Çuni, ish-gazetar në radion “Kosova e Lirë”
E donatori i gjithë këtij projekti është mërgimtari, Xhavit Lipaj, që jeton në Zvicër.
Para se të vendoseshin në këtë bunker, ekipi i radios Kosova e Lirë, raportonte në lëvizje.
Kronikë e realizuar nga gazetari Fidan Zejnullahu
