Në një intervistë ekskluzive për Tëvë 1, ai thotë se BE-ja ka sugjeruar disa opsione për këtë por që nuk janë marrë parasysh nga palët.
Sipas tij, problemi qëndron se marrëveshje të tilla janë nënshkruar më parë por që nuk po respektohen nga palët.
“Për këtë çështje duhet një zgjidhje evropiane. Bashkimi Evropian si ndërmjetësues i ka sugjeruar disa opsione por që palët nuk janë pajtuar. Të dyja palët duhet të tregohen fleksibile dhe ta gjejnë një zgjidhje kompromisi. Problemi qëndron se këto marrëveshje janë nënshkruar më parë, por që nuk po respektohen nga palët”, tha ai.
Kurse, sa i përket rrjedhës së dialogut Szunyog thotë se ka pasur disa lëvizje të prekshme, por që bisedimet nuk janë të lehta dhe se duhet të lëvizet më shpejt.
“Ka pasur disa lëvizje të prekshme në procesin e dialogut, por duhet të lëvizet më shpejtë. Ndoshta nuk shihet nga jashtë, por bisedimet nuk janë aspak të lehta. Sot Kosova ka numrin e saj të telefonit celular, ka lëvizje të lirë dhe të sigurt në pikat kufitare dhe disa çështje të tjera, të gjitha këto janë arritur përmes dialogut. Ndërsa ka disa marrëveshje të cilat janë arritur, por që nuk kanë gjetur zbatim nga palët, kjo duhet të ndryshoj. Duhet të arrijmë deri të normalizimi i plotë i marrëdhënieve”, shtoi ai.
Ndërkaq, sa i përket normalizimit të marrëdhënëieve ai tha se është e rëndësishme që në rajon të ketë një stabilitet sa i përket sigurisë, duke përmendur luftën në Ukrainë nga agresioni rus.
Madje, ai u shpreh se duhet lëvizur më shpejtë në këtë drejtim dhe në një mënyrë strategjike.
“Është një dialog mes Kosovës dhe Serbisë, puna jonë është vetëm ta lehtësojmë këtë proces dhe u takon palëve që të merren vesh me njëra tjetrën. Jemi në vitin 2022, në një situatë krejtësisht të re strategjike kur po ndodh një luftë në Ukrainë si pasojë e agresionit rus. Kjo ka ndryshuar perceptimin e sigurisë së Evropës, prandaj është shumë e rëndësishme për ne që regjioni i Ballkanit të jetë stabil. Prandaj duhet t’i lëvizim gjërat më shpejtë, dhe të mendojmë në mënyrë strategjike”, shtoi ai.
