Gjatë së premtes shteti vendosi çmim maksimal prej 1.7 euro për litrin e naftës dhe 1.36 euro për atë të benzinës.
E çmimet maksimale të përcaktuara nga shteti po reflektohen edhe nëpër çmimoret e pompave të derivateve.
Në një përgjigje për televizionin, Ministria e Tregtisë ka bërë të ditur se çmimi tavan për derivate do të përcaktohet përgjatë tërë shtatorit, deri në një vendim tjetër.
“Vendimi për rregullimin e çmimeve, i dt. 30.08.2022, mbetet në fuqi tridhjetë (30) ditë. Varësisht nga rrethanat që mund të krijohen, si dhe raportit të Inspektoratit të Tregut, i rekomandohet ministres marrja e vendimit për rregullim e çmimeve”, kanë thënë nga MINT.
E me këtë mënyrë të caktimit të çmimit maksimal të karburanteve po pajtohen edhe nga Shoqata e Naftëtarëve.
“Vendimi i qeverisë duhet të respektohet. Ne kemi pasur takim ne Ministrinë e Tregtisë dhe jemi dakorduar që importuesit t’i kenë 2 centë marzhë fitimi në import ndërsa pikat e karburantit me pakicë t’i kenë 12 centë. Ky vendim po respektohet nga pompat e derivateve në vend”, tha kryetari i Shoqatës së Naftëtarëve, Fadil Berjani.
Megjithatë njohës të ekonomisë vlerësojnë se qeveria duhet të ndërhyjë për ta ulur edhe më shumë çmimin e derivateve, sidomos për kategori të caktuara.
“Kërkohet një reflektim më i madh i Qeverisë përmes heqjes së taksës edhe akcizës për naftën që përdoret për transportin urban, prodhuesit e bujqësisë, prodhues të tjerë, por gjithashtu të ketë një lirim 30-50 % edhe për konsumatorët e tjerë”, theksoi ekonomisti, Imer Raçi.
Qëkur rifilloi caktimi i çmimit tavan nga 1 shtatori, të premten është shënuar çmimi më i ulët i litrit të naftës. Teksa një metodë e tillë ishte aplikuar edhe prej fundit të qershorit deri në fund të korrikut.
Kronikë e realizuar nga gazetari, Gojart Jashari
