Kryetari i Partisë Demokratike të Kosovës, Memli Krasniqi ka thënë se Policia e Kosovës ndonëse me kushte jo të favorshme të punës , e pa paga dinjitoze mbetet një ndër institucionet më të shquara që ofron shërbim e siguri për qytetarët pa dallim.
Ai ka është shprehur se është përherë mirënjohës ndaj Policisë së Kosovës, shkruan teve1.info
“23 vite më parë, Kosova u bë me Shërbimin Policor të Kosovës, që më pas u shndërrua në Polici të Kosovës, për t’i hapur rrugë mbrojtjes së qytetarëve, rendit dhe ligjit në vendin tonë. Aktualisht, Policia jonë, ndonëse me kushte jo të favorshme të punës, e pa paga dinjitoze, mbetet një ndër institucionet më të shquara që ofron shërbim e siguri për secilin, pa dallim. Respekt për punën dhe angazhimin e mijëra grave e burrave që ndër vite kanë vendosur të shërbejnë në Policinë Kosovës, duke ju përmbajtur me dinjitet vizionit, misionit dhe vlerave të këtij profesioni fisnik. Përherë mirënjohës!”, ka shkruar Krasniqi në Facebook.
E kreu i Aleancës për Ardhmërinë e Kosovës, Ramush Haradinaj ka përgëzuar pjestarët e Policisë së Kosovës për shërbimin e tyre dhe ka rikujtuar ata që ranë në krye të detyrës.
Tutje Haradinaj ka thënë se shteti duhet të bëjë të pamundurën që të trajtoj me dinjitet e me paga të dinjitetshme Policinë.
“Në njëzetetre vjetorin e themelimit të Policisë së Kosovës, përgëzoj të gjithë pjesëtarët e Policisë për shërbimin e tyre dhe kujtoj me nder e respekt ata që ranë në krye të detyrës. Policia e Kosovës është storie suksesi për Republikën e Kosovës, andaj shteti vazhdimisht duhet të bëjë të pamundurën që ta trajtojë me dinjitet, me paga të dinjitetshme dhe me krijimin e kushteve në përputhje me kompleksitetin e detyrave që kryejnë”, ka shkruar Haradinaj.