Përmes një komunikate për media , KPK dhe Prokurori i Shtetit shprehin shqetësimet e tyre lidhur me siç shprehen ata reciklimin e vazhdueshëm të deklaratave të pamatura, të paverifikuara dhe deklarimin e pasaktë të raporteve zyrtare dhe të dhënave statistikore lidhur me sistemin prokurorial, përcjellë teve1.info.
Ata thonë se kryeministri Kurti sot ka dhënë informacione të pasakta që nuk prekin me realitetin dhe janë krejtësisht tendencioze.
“KPK dhe Prokurori i Shtetit ia bëjnë me dije Kryeministrit dhe Qeverisë se statistikat zyrtare nuk hartohen me paragjykime, por verifikohen, analizohen me profesionalizëm dhe miratohen në takimet e hapura për publikun nga ana e Këshillit Prokurorial të Kosovës.”, thuhet në komunikatën e tyre.
Ndërkohë në reagimin e KPK-së thuhet se ky deklarim i kryeministrit që e cilësojnë si të pasaktë shpreh nevojën që kryeministri i Kosovës të bashkëpunojë me sistemin prokurorial në suaza të kompetencave, por duke respektuar normat dhe standardet e funksionimit demokratik.
Reagimi i plotë:
Reagim i Këshlllit Prokurorial të Kosovës dhe Prokurorit të Shtetit ndaj deklaratave të dhëna në një konferencë për media të Kryeministrit dhe Ministres së Drejtësisë
Prishtinë, 4 shtator 2022 – Këshilli Prokurorial dhe Prokurori i Shtetit shprehin sërish shqetësimin e thellë lidhur riciklimin e vazhdueshëm të deklaratave të pamatura, të paverifikuara ndaj sistemit prokurorial që po bëhen vetëm për konsum dhe agjendë politike nga ana e Kryeministrit të Qeverisë së Republikës së Kosovës.
Faktikisht, këto prononcime publike të Kryeministrit dhe Ministres së Drejtësisë për parashkrimin e rasteve të dhunës seksuale në Prokurori, demantohen tërësisht nga raportet zyrtare të sistemit prokurorial.
Nga raportet e KPK-së dhe Prokurorit të Shtetit, sipas të dhënave për veprat penale për rastet e dhunës seksuale përgjatë viteve 2017 deri në gjashtëmujorin e parë të vitit 2022, janë parashkruar katër (4) raste, që ka pasur të bëjnë me dhunën seksuale.
Në këtë rast, theksojmë se informacionet e deklaruara sot nga Kryeministri janë të pasakta, nuk kanë të bëjnë asgjë me realitetin dhe janë krejtësisht tendencioze ndaj sistemit prokurorial.
KPK dhe Prokurori i Shtetit ia bëjnë me dije Kryeministrit dhe Qeverisë se statistikat zyrtare nuk hartohen me paragjykime, por verifikohen, analizohen me profesionalizëm dhe miratohen në takimet e hapura për publikun nga ana e Këshillit Prokurorial të Kosovës.
Për më tepër, ky deklarim i pasaktë dhe tendencioz i Kryeministrit, shpreh nevojën që Kryeministri i vendit të bashkëpunojë dhe bashkëveprojë me sistemin prokurorial në suaza të kompetencave përkatëse, duke respektuar normat dhe standardet e funksionimit demokratik të institucioneve në Republikën e Kosovës.
