“Unë besoj fuqishëm se ka ardhur koha për të vendosur një kufi për gazin natyror rus të importuar përmes tubacioneve në Europë,” u tha von der Leyen gazetarëve në margjinat e një konference të ligjvënësve konservatorë gjermanë në Murnau.
A duhet që BE të vendosë një tavan në çmimet e gazit natyror?
Çmimet e energjisë në BE janë rritur që kur Rusia pushtoi Ukrainën shkurtin e kaluar. Në fakt, në ditët e fundit kostoja e energjisë elektrike në BE ka qenë dhjetë herë më e lartë se mesatarja e dekadës së fundit.
Dhe kjo, kryesisht për shkak të rritjes së çmimit të gazit natyror. Ndërsa konsumatorët përballen me çmime gjithnjë e më të larta, liderëve të BE-së po u kërkohet të veprojnë për të zbutur kostot e tepruara të energjisë.
Si mund ta arrijnë këtë?
“Një mënyrë është vendosja e një kufiri në çmimet e gazit natyror për energjinë elektrike,” sipas Gzero.
Një propozim, i paraqitur nga kryeministri italian në largim Mario Draghi, është të vendoset një kufi mbi çmimin e gazit rus të blerë nga kompanitë energjetike të BE-së.
Një veprim i tillë do të kufizonte fuqinë negociuese të Moskës kundrejt BE-së. Në të njëjtën kohë, megjithatë, do të rrezikonte ndërprerjen e plotë e flukseve të gazit rus në BE nga Moska (shembuj të të cilëve i kemi parë tashmë përmes ndërprerjeve të njëpasnjëshme – ndoshta të shtirura përmes Nord Stream 1).
Një tjetër opsion është vendosja e një kufiri në çmimin e gazit natyror që përdoret për prodhimin e energjisë elektrike pavarësisht nga vendi i origjinës.
Në një rast të tillë, qeveritë e BE-së do t’u paguajnë kompanive energjetike diferencën midis këtij kufiri dhe çmimit më të lartë të gazit, në mënyrë që kompanitë të mos kenë nevojë t’ia kalojnë koston konsumatorëve./abcnews.al
