Në komunikatën e përbashkët thuhet se nxënësve po u mohohet e drejta themelore për arsim.
“Nëse sot më 1 shtator nuk fillon mësimi, rreth 320,000 nxënësve do t’i mohohet e drejta themelore për arsim. Në mesin e tyre, e drejta për arsim do t’i mohohet rreth 25,000 fëmijëve të cilët presin të ulen në bankat e shkollës për herë të parë”, thuhet në komunikatë.
Teksa u është bërë thirrje palëve në këtë proces të kenë konsideratë kryesore interesin më të mirë të fëmijës, të gjejnë një zgjidhje të përbashkët, pasi ndërprerja e arsimit dëmton më së shumti fëmijët.
“Mohimi i arsimit është shkelje e të drejtës themelore të fëmijës, e garantuar me Kushtetutën e Republikës së Kosovës dhe Konventën Ndërkombëtare për të Drejtat e Fëmijës. KOMF i bën thirrje palëve në këtë proces të kenë konsideratë kryesore interesin më të mirë të fëmijës, të gjejnë një zgjidhje të përbashkët, pasi ndërprerja e arsimit dëmton më së shumti fëmijë”, thuhet tutje.
Kurse sot arsimi parauniversitar në Kosovë, do të duhet të niste vitin e ri shkollor. Por, kjo gjë nuk ka ndodhur, pasi mësimdhënësit kanë hyrë në grevë të thirrur nga BSPK, të cilët po kërkojnë mjete shtesë./teve1.info./
