32 vjeçari, Telat Ademi nga komuna e Mitrovicës, pak muaj pas lindjes u diagnostikua me paralizë cerebrale.
Jeta e tij nuk ka qenë aspak e lehtë brenda këtyre viteve. Madje, edhe më të mundimshme kanë qenë ditët kur atij i është dashur me shumë vështirësi të dalë jashtë shtëpisë për të realizuar kontrolla shëndetësore.
E që nga ky muaj ai do ta ketë më të lehtë, kjo pasi komuna e Mitrovicës ka angazhuar dy ekipe mjekësore për të kryer shërbime shëndetësore në shtëpi, për personat e palëvizshëm.
E këtë herë, për të mësuar më shumë rreth gjendjes shëndetësore të Ademit, ka shkuar infermierja, Emine Bala.
“E thirrim në telefon pacientin na cakton terminin e masim tensionin e gjakut, dikometrin, temperaturën i jepim këshilla e tashm e dy vite i bëjmë edhe testet për covid”.
Një iniciativë të tillë, nga komuna e Mitrovicës thonë se kanë ndërmarrë me qëllim që tu dalin në ndihmë sado pak këtyre pacientëve, marrë parasysh që vizitat e tyre në Qendrat e Mjekësisë Familjare kanë qenë thuajse të pamundura.
“Kemi nënshkru një kontratë përmes së cilës ne me dy ekipe mjekësore do të mund të u ofrojmë shërbime shëndetësore personave të palëvizshëm të cilët nuk kanë mundësi të lëvizin të shkojnë në qendrat e mjekësisë familjare e për disa shërbime shëndetësore për të cilët kanë nevojë ti marrin në shtëpi”, bëri të ditur Drejtori i shëndetësisë në Komunën e Mitorivës, Fahri Shabani.
Ndryshe, komuna e Mitrovicës ka paraparë që shërbimet shëndetësore nga ana e mantelbardhëve tek pacientët e palëvizshëm të ofrohen për një vit rresht, me mundësi vazhdimi.
Kronika e realizuar nga gazetarja Lendrina Kodrolli.