Kryetarja e Dhomës së SHBA-së, Nancy Pelosi vizitoi ishullin më 3 dhe 4 gusht.
Kina e quajti vizitën e Pelosit provokuese dhe tha se ajo minon sovranitetin dhe integritetin territorial të vendit.
Masat për të cilat Kina njoftoi të premten janë në mesin e shumë hapave të premtuar që synojnë ndëshkimin e Uashingtonit për lejimin e vizitës së Pelosit në ishullin që Pekini e pretendon si territor të vetin.
Kina po zhvillon stërvitje kërcënuese ushtarake në gjashtë zona jashtë brigjeve të Tajvanit.
Raketat u lëshuan gjithashtu mbi Tajvan, thanë zyrtarët e mbrojtjes për mediet shtetërore.
Kina kundërshton që ishulli vetëqeverisës të ketë marrëdhënie me qeveritë e huaja.
Ministria e Jashtme e Kinës tha se dialogu midis komandantëve të zonave dhe krerëve të departamenteve të mbrojtjes do të anulohet, së bashku me bisedimet për sigurinë ushtarake detare. Ministria tha se bashkëpunimi për kthimin e emigrantëve të paligjshëm, hetimet penale, krimi transnacional, droga ilegale dhe ndryshimet klimatike do të pezullohen.
Këmbëngulja e Kinës që Tajvani është territori i saj dhe kërcënimi për të përdorur forcën për ta vënë atë nën kontroll është shfaqur shumë në propagandën e Partisë Komuniste në pushtet dhe medieve tërësisht të kontrolluara nga shteti për më shumë se shtatë dekada, që kur palët u ndanë me luftë civile në vitin 1949.
