Dosja e Prokurorisë ka zbardhur detaje tronditëse nga vrasja e Sylë Dakajt në Suharekë. Sipas dosjes, Rrahman Morina e vrau me disa plumba Dakajn, duke qëlluar me armë zjarri fillimisht në xhamin e veturës, e më pas duke hapur derën e automjetit dhe duke qëlluar përsëri në trupin e viktimës.
Sylë Dakaj mbeti i vrarë në parkingun e një qendre tregtare në Suharekë, pasi u godit disa herë me plumba nga Rrahman Hoti.
Dosja e Prokurorisë ka zbardhur detaje të rënda.
Rrahman Hoti dyshohet se fillimisht gjuajti me armë zjarri në drejtim të veturës së Dakajt, duke goditur xhamin e ulëses së shoferit, ku ndodhej viktima.
Brenda veturës, ndodheshin edhe bashkëshortja e tij, dhe vajza e mitur.
Pasi goditi xhamin e vetueës, Rrahman Hoti e hapi derën duke e goditur Dakajn edhe me disa plumba të tjerë.
Gjithë ky krim, dyshohet se ndodhi për një mosmarrëveshje për parking.
Armën të cilën e kishte në posedim Hoti dyshohet se ishte me leje, përkundër që në Kosovë u kthye pasi e dëboi Zvicra, si shkak i përfundimit të burgimit 19 vjeçar, pas vrasjes së bashkëshortes.
“Kthimi i tij në Kosovë ashtu, ashtu përcillet nga institucionet tona të sigurisë, edhe të policisë, edhe të prokurorisë, edhe të gjykatës, për arsye se kemi të bëjmë me një person i cili ka marrë jetën e gruas së tij, dhe ndërkohë kemi informacione se fëmija e tij, pastaj nuk e ka pranuar si prind që të jetë në prezencë me ta. Prandaj, unë mendoj se institucionet e sigurisë në bazë të databazës që i kanë, edhe prokuroria, edhe gjykata, bashkë ta përcjellin një person”, thotë ish-koloneli i policisë Refki Morina.
Në rast se kjo vërtetohet, sipas njohësve të ligjit, konsiderohet si lëshim i rëndë.
“Kjo është lëshim i institucioneve të rendit dhe sigurisë sepse secili person i cili aplikon për posedim të armës me leje, natyrisht hapi i parë që duhet të bënin organet e sigurisë, do të ishte verifikimi i statusit të personit i cili aplikon për armë që të verifikojë i njëjti a ka precedent penal dhe cilat janë arsyet e precedentit penal e pas këtij vlerësimi atëherë do duhej të vazhdohej me tutje”, thotë Anton Nrecaj-jurist.
Televizioni ka dërguar pyetje për dhënien e lejes për armë në Ministrinë e Punëve të Brendshme, mirëpo deri në publikimin e kronikës nuk ka pranuar përgjigje.
Por, në kërkesën për paraburgim ndaj Rrahman Hotit, Prokuroria e ka ngarkuar atë edhe me “Mbajtje në pronësi, kontroll ose posedim të paautorizuar të armëve”



