Prezenca e tyre u shtua qysh para orës 12:00.
Zyrtarë policorë zunë vende në pothuajse çdo cep të hyrjes në Zyrën e Bashkimit Evropian në Kosovë.
Kjo pasi në mesditën e së martës, u paralajmërua aksion simbolik.
Kur koha afroi, u mblodhën edhe qytetarë.
Ky ishte baneri kryesor i këtij aksioni.
Ai u vendos edhe në dyert e këtij institucioni evropian.
“Ne besojmë se drejtësia nuk mund të jetë selektive, nuk mund të udhëhiqet nga paragjykimet dhe as të zbatohet me standarde të ndryshme, varësisht nga kombësia, historia apo përkatësia politike e të akuzuarve”, ka thënë Haziri.
Iniciativa qytetare “Jo në emrin tim”, kërkoi llogari nga BE-ja për dënimet që Gjykata Speciale u ka shqiptuar të akuzuarve për krime lufte dhe pengimit të administrimit të drejtësisë.
“Evropë, ku është drejtësia sot? Si mund të shpjegohet se ata që udhëhoqën një luftë çlirimtare, sot përballen me një sistem gjyqësor, standarde të të cilit ngrejnë kaq shumë pikëpyetje. Ndërkohë që, përgjegjësit e aparatit shtetëror serb, të dënuar për krime të rënda kundër popullsisë civile shqiptare janë gjykuar nga një standard tjetër i praktikës ndërkombëtare”, u shpreh tutje Haziri.
Kjo pasi sipas tij, në Hagë u shpërfaqën shkelje të rënda në proceset ndaj ish-presidentit, Hashim Thaçi.
Haziri renditi edhe kërkesat e tyre.
“Kërkojmë që parimet e Konventës Evropiane për të Drejtat e Njeriut, prezumimi i pafajësisë, barazia para ligjit, dhe e drejta për një gjykim të drejtë, të mos jenë standarde të zbatueshme sipas interesave politike, por detyrime universale”, theksoj tutje Haziri.
Nga “Jo në emrin tim”, nuk u përjashtua as mundësia e organizimit të protestave mbarëpopullore.
“Nëse vazhdohet me këtë heshtje, gjithashtu insticionale edhe këtë heshtje të institucioneve evropiane, pra ne nuk do t’i lejojmë dhe nuk do të mundemi të qëndrojmë të heshtur dhe do ta shfrytëzojmë të drejtën tonë për protestë”, përfundoj Haziri.
Thaçi dhe të tjerët morën një dënim në total me 3 vite e 6 muaj burgim.







