Ishte mbrëmja e së shtunës.
Astrit Tahiri nga fshati Druar i Vushtrrisë sapo kishte parkuar veturën në garazhin e tij.
Por, pa hyrë ende në shtëpi, një goditje e fortë u dëgjua në oborr.
Një veturë tjetër kishte përfunduar brenda garazhit të tij.
Sipas Tahirit, shkak i aksidentit dyshohet të jetë shpejtësia e madhe.
“Dëmi është mjaft i madh. Rreth orës 21:00 të mbrëmjes, një bashkëfshatar nga pjesa e sipërme e fshatit ishte duke u lëshuar poshtë dhe pa frenuar, e ka goditur murin këtu, siç shihet. Dëmi është shumë i madh në veturë dhe në garazh”, tregon Astrit Tahiri-pronar i garazhës.
Kjo ngjarje i ka shqetësuar edhe fëmijët e Tahirit, të cilët e panë të gjithë momentin.
“Unë kam qenë me fëmijë në qytet. Kur jam kthyer, kam qenë duke hyrë brenda, saktësisht në ballkon, afër shtëpisë. Por zhurma ka qenë shumë e madhe. Fëmijët i kam futur brenda. Edhe ata janë shumë të shqetësuar, nuk kanë fjetur gjithë natë|, shprehet ai.
Ndërkaq, sipas Tahirit, shoferi i veturës që goditi garazhin ishte i mitur.
“Realisht nuk e di sa i ka pasur, por në bazë të pamjeve, ai ka qenë i mitur. Saktë nuk guxoj të them sa i ka pasur, por diku 15-16 vjeç, më shumë nuk ka qenë. Ka qenë i lënduar rëndë. Brenda një minute e kam lajmëruar Policinë dhe Emergjencën. Ka ardhur fillimisht ndihma e shpejtë dhe e ka marrë, pastaj ka ardhur Policia. Ne nuk kemi ndërhyrë, nuk kemi guxuar të bëjmë asgjë, sepse ka qenë në gjendje të keqe”, thotë ai.
Përveç shqetësimit që shkaktoi ngjarja, dëmet materiale, sipas Tahirit, janë të mëdha.
“Mua më ka shkaktuar shumë dëme. Tash komplet duhet të renovohet. Nuk jam i sigurt të fus më diçka këtu, e lëre më të hyjnë fëmijët. Realisht, vetura sillet diku 7-8 mijë euro, por kjo është thuajse e hedhur poshtë, nuk rregullohet. Muri është i dëmtuar, garazhi është i dëmtuar. Këto duhet të renovohen komplet”, ka thënë ai.
Ngjarja ndodhi rreth orës 21:00, të shtunën, në fshatin Druar të Vushtrrisë.
