Kryeministri i Kosovës ka takuar kryeministrin e Kanadasë, Mark Carney në margjina të Samitit të Komunitetit Politik Evropian.
Kurti tha se Kanadaja është partnere e rëndësishme për sigurinë mbrojtjen dhe promovimin e vlerave të përbashkëta.
Ai ka thënë se në takim është diskutuar për marrëdhëniet dypalëshe dhe se ka falënderuar për miqësinë dhe përkrahjen e Kanadasë për pranimin e mijëra refugjatëve nga Kosova gjatë vitit 1999
“Biseduam për marrëdhëniet dypalëshe, për sigurinë dhe për mundësitë e zgjerimit të bashkëpunimit. E falënderova për miqësinë dhe përkrahjen e Kanadasë për vendin tonë, për pranimin e mijëra refugjatëve nga Kosova gjatë vitit 1999, për pjesëmarrjen në intervenimin e NATO-s, për kontributin në rindërtim dhe zhvillim, për njohjen e pavarësisë dhe për mbështetjen në anëtarësimin në organizata ndërkombëtare. Këtë vit në mars, Kosova me një delegacion qeveritar ishte pjesë e Konventës së Shoqatës së Kërkuesve dhe Zhvilluesve të Kanadasë (PDAC) në Toronto, një nga ngjarjet më të mëdha botërore për sektorin e minierave. Kanadaja, shtet anëtar i NATO-s dhe i G7, është mike dhe partnere e rëndësishme për sigurinë, mbrojtjen dhe promovimin e vlerave të përbashkëta”, ka shkruar Kurti./teve1.info/
