Më shumë se 40 liderë evropianë u mblodhën të enjten në Dublin, pranë lumit Liffey, në kuadër të Samitit të Komunitetit Politik Evropian, ku në fokus ishte siguria e brishtë e kontinentit dhe përpjekjet e reja të mbështetura nga SHBA-ja për rifillimin e negociatave për përfundimin e luftës mes Rusisë dhe Ukrainës.
Në takim morën pjesë krerë shtetesh dhe qeverish nga Bashkimi Evropian dhe vende të tjera evropiane, përfshirë Mbretërinë e Bashkuar, si dhe presidenti ukrainas Volodymyr Zelensky, kryeministri kanadez Mark Carney dhe sekretari i përgjithshëm i NATO-s, Mark Rutte.
Kryeministri irlandez Micheal Martin deklaroi se Komuniteti Politik Evropian u mundëson liderëve të bashkohen për të avancuar sigurinë, stabilitetin dhe prosperitetin e kontinentit.
“Ai u krijua si pjesë e reagimit të përbashkët evropian ndaj paqëndrueshmërisë në rritje politike rajonale dhe globale, si dhe për të sjellë më shumë koordinim në përballjen me sfidat që kemi në të gjithë kontinentin“, tha Martin gjatë pritjes së Zelenskyt në Dublin.
Komuniteti Politik Evropian u themelua në vitin 2022, me iniciativën e presidentit francez Emmanuel Macron dhe ish-kancelarit gjerman Olaf Scholz, pas pushtimit të plotë rus të Ukrainës.
Qëllimi i tij ishte krijimi i një forumi bashkëpunimi mes vendeve anëtare dhe atyre jashtë Bashkimit Evropian.
Lufta në Ukrainë mbetet një nga temat kryesore të takimeve, ndërsa forumi është shndërruar gjithashtu në një hapësirë për diskutimin e sigurisë evropiane, veçanërisht pas rikthimit të Donald Trumpit në Shtëpinë e Bardhë dhe tensioneve të krijuara në marrëdhëniet transatlantike.
Pjesëmarrja e kryeministrit kanadez Mark Carney pasqyron synimin e tij për forcimin e lidhjeve me Evropën, në një kohë kur marrëdhëniet mes Kanadasë dhe SHBA-së janë tensionuar nga lufta tregtare dhe deklaratat e Trumpit për aneksimin e Kanadasë.
Ndërkohë, Mbretëria e Bashkuar po synon gjithashtu afrimin me Bashkimin Evropian, rreth gjashtë vjet pas Brexit-it.
Komuniteti Politik Evropian i ofron Londrës mundësinë të marrë pjesë në një forum të gjerë politik evropian, pavarësisht largimit nga blloku.
Samiti i Komunitetit Politik Evropian mbahet dy herë në vit, një herë në një shtet anëtar të BE-së dhe një herë jashtë tij. Takimi i radhës pritet të zhvillohet në prill në Cyrih të Zvicrës.
