Është hapësira në lagjen “Ulpiana”, në Prishtinë e njohur si “Fontana”.
Pikërisht këtu është planifikuar të ndërtohet një objekt dhjetëkatësh, në kuadër të projektit “Ulpiana 2030 Legacy”.
Objekti do të shërbejë për akomodimin e atletëve dhe stafit përcjellës gjatë Lojërave Mesdhetare të vitit 2030.
Projekti parasheh edhe ndërtimin e një garazhi nëntokësor, me kapacitet për rreth 750 deri në 800 vetura.
Por banorët e kësaj rrethine nuk e kanë mirëpritur këtë vendim.
Ata kërkojnë që hapësirat e gjelbra të ruhen.
“Në çoftë se prishet kjo hapësira e gjelbër, atëherë është e dëmshme, se neve na duhet hapësirë e gjelbër por në çoftë se e rregullojnë dhe prapë e bëjnë hapësirë të gjelbër, ajo është në rregull”, ka thënë një qytetar.
“Është ka bëhet një degradim i madh i qytetit fatkeqësish, gjithçka po shëndërrohet në beton po tash kjo puna e lojërave mesdhetare ka të bëjë pak edhe me afirmim të Kosovës, nëse s’ka vend tjetër, atëherë s’kemi çka me bërë por përndryshe i kisha jep përparësi gjelbërimit”, u shpreh qytetari tjetër.
Ndërsa të tjerë thonë se projekti mund të realizohet nëse nuk dëmtohet kjo hapësirë.
“Gjelbërimi s’kisha propozu me u heq ,na po vrapojmë pas gjelbërimit. Nëse është ndonjë hapësirë tjetër jashtë Fontanëes le të ndërtohen, por jo brenda Fontanës. Veç Fontanën mos na e prekni, jashtë Fontanës ndreqni gjithçka”, tha poashtu edhe një qytetar tjetër.
Ndërkaq në Komunën e Prishtinës thonë se projekti nuk parasheh prekjen e Fontanës.
“Me ndërtimin e një objekti nëntokësor, domethënë, garazhës, do të ketë kapacitet prej 750 deri në 800 vetura. Domethënë, i gjithë objekti kishte qenë garazhu nëntokësor, nuk kishte prek fare Fontanën, po e kishte rritur hapësirën gjelbëruese dhe rekruese të lagjes të Ulpianës për 10.000 m katrorë. Domethënë, veturat që gjenden për momentin në 10.000 m katrorë hapësirë parkuese, ishin futur nën tokë”, u shpreh Ramku.
Kurse, pas përfundimit të lojërave mesdhetare, apartamentet do të shfrytëzoheshin për banim.
“Kishim larguar 10.000 m2 të betonizuar dhe të asfaltuar, i kishim futur gjelbërim edhe hapësirë rekruese, i kishim futur nëntokë. Domethënë, 10 kate me akomodim të 500 atletëve, pas lojërave 250 banorëve, me shitjen e këtyre, e këtyre në hapësirave, domethënë, apartamenteve, është mbuluar kostoja e gjithë objekti garazhues”, u shpreh tutje Ramku.
Kundër këtij projekti janë në partinë më të madhe opozitare në Kuvendin Komunal të Prishtinës.
“Ne si Lëvizje Vetëvendosje, në seancën e radhës, kur do që ajo të mbahet, do të propozojmë që të bëhet anulimi i vendimit për projektin Ulpiana 2030 Legacy. Është qasje e vazhdueshme e Përparim Ramës dhe qeverisë aktuale, degradimi urbanistik në kryeqytet”, ka thënë Sveçla.
Lokacioni për realizimin e projektit u miratua më 6 nëntor në Kuvendin Komunal të Prishtinës.
Ndërkaq, nga Komuna e Prishtinës kanë thënë se projekti nuk do të realizohet nëse banorët nuk pajtohen me të.
