Është foto e 8 nëntorit.
Përfaqësues të Listës Studentore që fitoi pushtetin në Serbi, erdhën për vizitë në Kosovë.
Ata vizituan Manastirin e Graçanicës e më pas të Deçanit dhe monumente tjera ortodokse.
Nga këtu, vazhduan me deklarime të njëjta sikur ish-pushteti i Vuçiqit, se Kosova është pjesë e pandashme e Serbisë.
Por, a ishin në dijeni institucionet e Kosovës për një vizitë të tillë?
“Ata janë ende qytetarë të Serbisë pa pozita shtetërore, ne kemi reciprocitet, ju e dini që çdo vendim që ka marrë Serbia ne iu kemi kundërvë, andaj ata ende nuk janë zyrtarë të lartë sikur qysh janë të Vuçiqit, të cilët kanë ndalesa …. Nuk ka nevojë asnjë qytetarë i Serbisë i cili s’ka funksion të futet sepse ashtu i bie që 6 milionë njerëz duhet me i ndalu”, ka thënë Bajqinovci.
Megjithatë, sipas kryetarit të Komisionit për Siguri, Mefail Bajqinovci deklarimet e tyre janë shqetësuese, andaj do të kërkohet raport nga institucionet.
“Në Serbi ka pas shpesh ndryshime të pushtetit çdo 10-15 vjet por nuk është që kemi parë ndonjë ndryshim të madh karshi Kosovës si subjekte politike… Ne do të kërkojmë informacion nga ministri i Brendshëm, por të paktën ata janë vetëm qytetarë të Serbisë”, ka thënë tutje Bajqinovci.
Shqetësime për këtë vizitë dhe deklarimet e tyre, janë shprehur edhe nga partitë opozitare.
“Dihet se Kisha Ortodokse Serbe gjithmonë ka pasë një politikë anti-shqiptare dhe nga aty ata kanë përçu mesazhet sesi Kosova është pjesë e Serbisë sipas kushtetutës së tyre gjë që është një shqetësim serioz edhe për institucionet por edhe për qytetarët e Kosovës”, tha Hadërgjonaj.
Kurse sipas ish-gjeneralit të FSK-së, tash deputet, Rrahman Rama institucionet e sigurisë duhet vazhduar të jenë vigjilente karshi Serbisë.
“Po, rrezik paraqet dmth vet deklarimet e tyre e kanë qëllimin e qartë, bazuar edhe në Kushtetutën e kështu që nuk ka ndonjë ndryshim, nuk po them se ka ndodnjë rrezik sepse edhe institucionet tona janë të përgatitura por edhe miqtë e partnerët tanë që janë këtu në mision, nuk e shoh ndonjë rrezik por vetë deklarimi i tyre është rrezik jo vetëm për Kosovën por për rajonin, në Ballkan”, u shpreh Rama.
Gjatë ditës u mbajt mbledhje e Komisionit për Siguri, ku u dakordua të kërkohen sqarime nga Ministri i Punëve të Brendshme, lidhur me këtë vizitë të tyre.
Ndërkaq, të martën tëvë1 u dërgoi pyetje MPB-së dhe Policisë së Kosovës, nëse kanë qenë në dijeni për këtë ngjarje, por që nuk i janë përgjigjur interesimit të televizionit.
