IKShPK u bën thirrje prindërve që të vaksinojnë fëmijët me vaksinën MMR për të parandaluar përhapjen e mëtejshme të sëmundjes.
Rastet me fruth në Kosovë po vazhdojnë të shënojnë rritje, ndërsa Instituti Kombëtar i Shëndetësisë Publike të Kosovës (IKShPK) ka konfirmuar gjithsej 299 raste nga 16 prilli deri më 8 nëntor 2026.
Sipas të dhënave të institutit, 30 raste të reja janë regjistruar vetëm gjatë javës së fundit. Fruthi është përhapur në 23 komuna të vendit, ndërsa pjesa më e madhe e të prekurve janë fëmijë.
Shqetësues mbetet fakti se mbi 95 për qind e personave të infektuar nuk kanë qenë të vaksinuar me vaksinën MMR, e cila mbron nga fruthi, parotiti dhe rubeola.
IKShPK rikujton se fruthi është një sëmundje shumë ngjitëse, e cila mund të shkaktojë komplikime serioze shëndetësore, veçanërisht te fëmijët e vegjël.
Ndërkohë, gjatë këtij viti, në kuadër të vaksinimit plotësues, janë vaksinuar 4 mijë e 69 fëmijë të moshës 2 deri në 5 vjeç, të cilët nuk i kishin marrë vaksinat sipas kalendarit të rregullt ose nuk i kishin përfunduar të dyja dozat.
Instituti u ka bërë thirrje prindërve që të kontrollojnë kartelat e vaksinimit të fëmijëve dhe, në rast se ndonjë dozë mungon, të kontaktojnë ekipet shëndetësore për të përfunduar procesin e vaksinimit.
Sipas IKShPK-së, vaksinimi në kohë mbetet mënyra më e rëndësishme për mbrojtjen e fëmijëve nga fruthi dhe parandalimin e përhapjes së mëtejshme të kësaj sëmundjeje.
