Në Gjykatën Themelore në Prishtinë është anuluar seanca e së premtes ndaj 12 zyrtarëve policorë të Stacionit Policor për Mbikëqyrje të Kufirit në Qafë Prush dhe dy zyrtarëve doganorë.
12 zyrtarët policorë të akuzuar në këtë rast janë: Artan Thaqi, Agron Bejtullahu, Afrim Deda, Avdi Përolli, Benon Këpuska, Isa Ibrahimi, Kreshnik Arllati, Malë Berisha, Mehmet Manxhuka, Sami Hajdari, Shaqir Krasniqi dhe Uran Mati, si dhe dy zyrtarët e Doganës, Senad Zherka dhe Enis Turtulla.
Aktakuza në këtë rast e ngarkon edhe të akuzuarin Enis Turtulla, por ndaj tij, në seancën e datës 24 shtator 2026, ishte veçuar procedura.
Nga zyra e gjykatësit Lutfi Shala është bërë e ditur se seanca e caktuar për të premten është anuluar, për shkak se anëtari i trupit gjykues, Vesel Ismaili, do të pensionohet më 10 nëntor 2026.
Në seancën fillestare të mbajtur më 21 shkurt 2024, 14 të akuzuarit ishin deklaruar të pafajshëm.
Në aktakuzën e siguruar nga “Betimi për Drejtësi”, e cila është ngritur më 26 dhjetor 2023, thuhet se nga muaji gusht deri në dhjetor të vitit 2021, në pikën kufitare Qafë Prush, të akuzuarit, në cilësinë e personave zyrtarë, kanë bashkëvepruar me njëri-tjetrin duke marrë shuma të ndryshme parash në formë ryshfeti.
Sipas akuzës, të akuzuarit, zyrtarët policorë, u kishin mundësuar qytetarëve hyrjen dhe daljen në pikën kufitare të lartcekur pa iu nënshtruar procedurave ligjore në fuqi, në kundërshtim me kushtet për hyrjen në Kosovë që lidheshin me masat kundër pandemisë COVID-19.
Ndërsa dy doganierët, Zherka dhe Turtulla, ngarkohen se, me qëllim të përfitimit të kundërligjshëm, kishin vepruar në kundërshtim me Kodin Doganor dhe të Akcizave të Kosovës, duke lejuar hyrjen e mallrave të ndryshme pa iu nënshtruar mbikëqyrjes doganore.
Me këto veprime, 14 të akuzuarit ngarkohen se kanë kryer veprën penale në vazhdim “Marrje ryshfeti”, në bashkëkryerje, nga neni 421, paragrafi 1, lidhur me paragrafin 2, si dhe me nenin 31 dhe nenin 77, paragrafi 1, nënparagrafët 1.2, 1.3, 1.4 dhe 1.5, si dhe paragrafin 5 të Kodit Penal të Republikës së Kosovës.
