Kryeministri i Kosovës, Albin Kurti ka thënë se raportet me Zvicrën po avancohen ku ka përmendur edhe marrëveshjen e EFTA-s, që sipas tij shënon një kapitull të ri.
Kurti, kështu është shprehur pas takimit që ka zhvilluar me Ignazio Cassis, ministër i Punëve të Jashtme të Zvicrës dhe kryesues i Organizatës për Siguri dhe Bashkëpunim në Evropë (OSBE),
“Mbi themelet e forta të lidhjes sonë me Zvicrën, që u vunë nga mërgata dhe mikpritja zvicerane në kohëra të vështira për shqiptarët e Kosovës, po ndërtojmë e avancojmë marrëdhëniet si Republikë, teksa po zgjerojmë bashkëpunimin, i cili me hyrjen në fuqi të EFTA-s muajin e kaluar shënon një kapitull të ri në tregtinë e lirë, përveçse të mallrave edhe të shërbimeve”, ka shkruar Kurti.
Ai duke shprehur mirënjohjen ndaj Zvicrës për mbështetjen e vazhdueshme në zhvillimin e Kosovës dhe kontributin në siguri në kuadër të KFOR-it, tha se biseduan për rëndësinë e kësaj mbështetje në rrugën integruese të Kosovës.
“Krahas diskutimeve për atë se çfarë mund të bëjmë më shumë, qeveri me qeveri e biznese me biznese, biseduam edhe për rëndësinë e Zvicrës në proceset integruese. Gjithashtu theksuam rolin e z. Cassis, si kryesues, në zbatimin e standardeve të barabarta në raportim nga OSBE-ja dhe në përfaqësimin e Kosovës në këtë organizatë”, ka shkruar Kurti.
Ai bëri të ditur se ka marrë ftesë nga ministri Cassis për Samitin e Dhjetë të Komunitetit Politik Evropian në Cyrih, në prill të vitit të ardhshëm.
