Iliana Yotova është gati të bëhet presidentja e parë grua e zgjedhur e Bullgarisë.
Ajo pasi fitoi balotazhin, tha se do të punojë për konsensus kombëtar duke kapërcyer përçarjet politike.
Me të gjitha votat e numëruara të hënën, Komisioni Qendror i Zgjedhjeve tha se Yotova siguroi 57.6%, ndërsa kandidati i opozitës liberale dhe pro-perëndimore, Andrey Gyurov, mori 39.5%.
Gyurov pranoi humbjen, duke thënë se “kështu kanë votuar qytetarët bullgarë” dhe shtoi se rezultatet duheshin pranuar ashtu siç ishin.
“Votova për konsensus kombëtar përmes dialogut, për institucione që punojnë për qytetarët, për një shtet të fortë me politikën e vet të jashtme në një Evropë të fortë”, tha Yotova pas votimit.
Përpara se të hynte në institucionin presidencial të Bullgarisë, Yotova shërbeu si anëtare e Parlamentit Evropian.
Politika e jashtme, veçanërisht lufta Rusi-Ukrainë, doli si një nga vijat kryesore ndarëse në fushatë.
Yotova ka kundërshtuar ndihmën e mëtejshme ushtarake bullgare për Ukrainën, duke argumentuar vazhdimisht se konflikti nuk ka zgjidhje ushtarake dhe duke bërë thirrje për një “koalicion për paqe” të përqendruar në diplomaci.
Presidentja e Komisionit Evropian, Ursula von der Leyen, e përgëzoi Yotovën dhe shpresoi për vazhdimin e bashkëpunimit me të në fushën e sigurisë dhe mbrojtjes, konkurrencës dhe pavarësisë energjetike.
