Shefi i Drejtorisë së Policisë Kriminale Serbe (UKP), Marko Kričak, u arrestua këtë mëngjes me urdhër të Zyrës së Prokurorit të Lartë Publik në Beograd, nën dyshimin për shpërdorim detyre, raportoi e përjavshmja serbe Radar.
Gjithashtu u arrestua edhe Boško Sekulović, kreu i Shërbimit të Shtypjes së Krimit.
Arrestimet lidhen me një padi penale të ngritur kundër dy zyrtarëve të lartë të policisë nga avokatët e Veselin Milić, ndihmësdrejtor policie dhe ish-shef i policisë së Beogradit. Milić pretendon se Kričak dhe Sekulović u përpoqën ta fajësonin për vrasjen në një restorant në Beograd.
Rasti lidhet me vrasjen e Aleksandar Nešović, i njohur me nofkën Baja, në restorantin “27” në Senjak të Beogradit. Kričak udhëhoqi aksionin policor pas vrasjes, dhe Milić, i cili atëherë ishte kreu i policisë së Beogradit, ishte përfshirë në kallëzimin penal fillestar, transmeton index.hr
Sipas raportit të avokatëve të Miliqit, Kriçak dhe Sekuloviq abuzuan me pozicionin e tyre për ta lidhur Miliqin me krimin. Ata dyshohen për falsifikim provash dhe presion ndaj dëshmitarëve dhe të dyshuarve që deklaratat e tyre të përputheshin me një version të paramenduar të ngjarjeve.
Avokatët e Milić-it ngritën një padi penale më 30 korrik 2026. Radar publikoi përmbajtjen e saj në fillim të gushtit, duke përfshirë pretendimet se dy zyrtarë policie nuk i dhanë prokurorisë të gjitha provat që kishin.
Pas vrasjes së Nešović-it, policia fillimisht e lidhi Milić-in me rastin. Megjithatë, gjatë hetimit, dolën prova që tregonin se ish-shefi i policisë së Beogradit nuk ishte në restorant në kohën e vrasjes.
Për shkak të kësaj, prokuroria hoqi dorë nga disa nga dyshimet e saj fillestare. Megjithatë, Milić u akuzua për moskallëzim të veprës penale dhe autorit të saj, si dhe falsifikim të një dokumenti zyrtar. Gjykimi i tij është planifikuar për 9 nëntor para Gjykatës së Parë Themelore në Beograd.
Avokatët e Milić-it pretendojnë se Kričak dhe Sekulović ishin në dijeni të pamjeve filmike të kamerave të mbikëqyrjes dhe të dhënave nga stacionet bazë mobile që nuk përputheshin me versionin origjinal të ngjarjeve të policisë përpara se të paraqisnin raportin.
