Deputeti i Lëvizjes Vetëvendosje, Artan Abrashi, ka kërkuar që të gjithë zyrtarët që kanë dështuar të ndërmarrin masa për parandalimin e vrasjes së Arlinda Zekajt të mbajnë përgjegjësi.
Gjatë fjalimit të tij në Kuvendin e Kosovës, Abrashi e ka cilësuar rastin si dështim institucional, duke kërkuar që institucionet përgjegjëse të veprojnë ndaj atyre që kanë kryer shkelje.
“Kjo është mizori e jo drejtësi”, ka deklaruar Abrashi, duke iu referuar rastit të Zekajt, e cila u vra pak ditë pasi u kishte dërguar letër institucioneve të sigurisë, duke paralajmëruar për rrezikun ndaj saj.
Ai ka kërkuar reagim edhe nga Këshilli Gjyqësor i Kosovës (KGJK) dhe Këshilli Prokurorial i Kosovës (KPK), duke theksuar se masat disiplinore nuk janë të mjaftueshme.
“KGJK dhe KPK të reagojnë, nuk mjafton masa disiplinore”, ka thënë Abrashi.
Deputeti i Vetëvendosjes ka shprehur gjithashtu mbështetjen për protestat e qytetarëve pas vrasjes së Zekajt, duke e cilësuar reagimin qytetar si të drejtë dhe të domosdoshëm për të kërkuar ndryshime.
“Ne përkrahim protestën. Revolta e atyre që protestojnë aktivisht dhe në heshtje është e drejtë, e domosdoshme dhe udhërrëfyese. Të mos heshtim, të dashur kolegë, të mos dorëzohemi, të luftojmë derisa të ndryshojë kjo gjendje. E kemi secili për detyrë”, ka deklaruar ai.
Një ditë më parë, në Prishtinë u mbajt protestë pas vrasjes së Arlinda Zekajt. Protestuesit kërkuan shkarkimin e ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla.
