Ambasada e Gjermanisë në Prishtinë ka shprehur pikëllimin për vrasjen e Arlinda Zekajt në Vitomiricë të Pejës, duke bërë thirrje për forcimin e mekanizmave mbrojtës dhe marrjen e masave konkrete për parandalimin e dhunës ndaj grave.
Përmes një reagimi publik, Ambasada gjermane ka shprehur ngushëllime për familjen dhe të afërmit e së ndjerës, duke theksuar se çdo grua ka të drejtë të jetojë e lirë nga frika dhe dhuna.
“Çdo grua ka të drejtë të jetojë e lirë nga frika dhe dhuna dhe kjo e drejtë duhet të garantohet përmes angazhimit të përbashkët dhe veprimeve konkrete”, thuhet në reagim.
Ambasada ka vlerësuar se vrasja e Arlinda Zekajt është një kujtesë e dhimbshme se femicidi nuk është një rast i izoluar, por një sfidë serioze shoqërore dhe manifestimi më ekstrem i dhunës ndaj grave.
Sipas ambasadës, mbrojtja e grave në rrezik duhet të jetë prioritet, ndërsa kjo kërkon masa efektive parandaluese, reagim me kohë nga institucionet dhe shërbime mbështetëse të qasshme për viktimat.
Në reagim, Ambasada gjermane ka rikujtuar se Kosova është palë në Konventën e Këshillit të Evropës për parandalimin dhe luftimin e dhunës ndaj grave dhe dhunës në familje.
Po ashtu, u është bërë thirrje të gjithë akterëve përgjegjës që të shtojnë përpjekjet për parandalimin e dhunës me bazë gjinore dhe zbatimin e mekanizmave ekzistues të mbrojtjes.
“U bëjmë thirrje të gjithë akterëve përkatës që të vazhdojnë t’i forcojnë përpjekjet për parandalimin e dhunës me bazë gjinore, zbatimin e mekanizmave ekzistues të mbrojtjes dhe kultivimin e një kulture në të cilën dhuna as nuk tolerohet dhe as nuk shpërfillet”, thuhet në reagimin e ambasadës.
