Prokuroria Themelore në Ferizaj kërkoi nga Gjykata Themelore në Ferizaj caktimin e masës së paraburgimit ndaj: J.A., dhe B.S., për shkak të dyshimit të veprave penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” dhe “Kultivimi i bimës së hashashit, shkurres së kokainës ose bimëve të kanabisit”.
Sipas kërkesës së parashtruar nga Prokuroria, ekziston dyshimi i bazuar se të pandehurit kanë marrë pjesë në transportimin e substancës së dyshuar narkotike të llojit marihuanë, me qëllim shitjen e saj në Ferizaj.
Prokuroria njoftoi se, J.A. dhe B.S., më 26.10.2026, rreth orës 17:15, nga zyrtarët policorë të DHTN-Ferizaj, janë ndaluar në dalje të autostradës në fshatin “Bibaj” dhe gjatë kontrollit të automjetit “Volkswagen Jetta“ është gjetur një qese e zezë najloni, brenda së cilës ndodheshin dhjetë qese të mbushura me substancë të dyshuar narkotike të llojit marihuanë, me peshë të përgjithshme prej 1,013.7 gramësh.
Të pandehurit nga 26 Tetor 2026, me vendim të Prokurorit të Shtetit gjenden nën masën e ndalimit 48-orësh.
