Kryeministri i Kosovës, Albin Kurti, ka njoftuar se të enjten, në margjinat e Samitit të Procesit të Berlinit, u takua me presidenten e Bankës Evropiane për Rindërtim dhe Zhvillim (BERZH), Odile Renaud-Basso.
Përmes një postimi në Facebook, Kurti ka bërë të ditur se gjatë takimit kanë vazhduar diskutimet nga takimi i tyre i fundit, i mbajtur në prill në Londër, për forcimin e bashkëpunimit dhe projektet infrastrukturore e ekonomike në Kosovë.
Kurti ka rikujtuar se, që nga anëtarësimi i Kosovës në BERZH në vitin 2012, banka ka ofruar përkrahje financiare prej rreth 967 milionë eurosh për 151 projekte në sektorin publik dhe privat.
Ai ka theksuar se në mandatin e ri synojnë që partneritetet për investime t’i bazojnë në prioritetet strategjike të Kosovës, përfshirë sigurinë energjetike dhe ujore, mbrojtjen, transportin e qëndrueshëm dhe infrastrukturën.
“BERZH-i mbetet partner i rëndësishëm edhe në rrugën tonë evropiane”, ka deklaruar Kurti./teve1.info/
