Po presin në radhë për t’u vaksinuar.
Kështu vaksinimi kundër gripit sezonal ka nisur këtë të enjte në Qendrat e Mjekësisë Familjare në Prishtinë.
E për Ragip Berishën, kjo është bërë tashmë rutinë.
Ai thotë se vaksinën e merr çdo vit, por këtë herë është dashur të presë më gjatë se zakonisht.
“Vjet e kemi marrë më herët, për çdo vit më herët është marrë, sivjet është bërë vonesë e madhe e gripi ia ka nis me fillu me të madhe. Çdo vit e marrë, nuk e di a me ndihmon çdoherë njëjtë”, u shpreh Ragip Berisha -qytetar.
Ndërkaq edhe për qytetarë të tjerë tashmë kjo vaksinë iu është bërë e përjetshme.
“Unë u vaksinova, e që 8 vite e marr këtë vaksinë. Sigurisht që më mbron është e mrekullueshme. Vet jam ardh jo me rekomandim të mjekut”, thotë Bislim Ademi-qytetar.
“Unë qe tetë vite me radhë e marrë, kam pa që po më ndihmon, se ndryshe jam prej shumë sëmundjeve. Prej gripave, se unë i pari grip që ka ardhur diku, menjëherë më ka kap”, shprehet qytetari, Kusum Beqiri.
E që në ditën e parë interesimi i qytetarëve ishte i madh.
“Vaksinimi po shkon mirë, kemi filluar prej orëve të para të mëngjesit, duke pasur një fluks të madh të qytetarëve, deri më tani janë vaksinuar afërsisht 100 persona. Deri tani kemi pasur më shumë të moshuar. Po presim që të rritet hala më shumë, mirëpo edhe prej fillimit është, dukshëm po vërehet interesimi”, thotë Rineta Turku -doktoreshë.
Për këtë fazë, QKMF-ja e Prishtinës është furnizuar me 4 mijë e 500 doza, të shpërndara në 16 njësi vaksinimi.
“Jemi furnizuar me 4,500 doza ne si QKMF-ja e kryeqytetit, të cilat me stafin e njësisë së vaksinimit janë shpërndarë ose distribuar në 16 njësi që i kemi në kuadër të kryeqytetit, përfshirë edhe C17, e cila gjendet në QKMF-në e Prishtinës. Domethënë vaksinat për gripin sezonal janë 4,500 për këtë fazë, nuk do të thotë që janë të tëra, ne do të furnizohemi në vazhdimësi me vaksina meqë, mbas informacioneve që i kemi nga Ministria e Shëndetësisë, kanë sasi të mjaftueshme dhe asnjë qytetar nuk ka nevojë që të shqetësohet në lidhje me atë se a do të furnizohet ose a do të vaksinohet apo jo. Të gjitha vaksinat janë, sikur gjithmonë, pa pagesë, dhe vaksinimi mund të bëhet në Qendrat e Mjekësisë Familjare në këto 16 njësitë që i kemi në Prishtinë ose në kryeqytet”, shprehet Valdet Hasani –drejtor i QKMF-së.
Vaksinimi në kryeqytet në qendrën kryesore, fillon nga ora 7:00 deri në ora 20:00, ndërsa në qendrat tjera nga ora 7:00 deri në 13:30.
