Kryetari i Komisionit për Mirëqenie Sociale, Punë, Familje, Vlerat e Luftës Çlirimtare, Viktimat e Dhunës Seksuale të Luftës dhe Personat e Pagjetur, Arton Konushevci, ka deklaruar se mosmiratimi i amendamentit për ndarjen e një milion eurove shtesë për protezat e invalidëve të luftës nuk nënkupton ndërprerje apo mungesë të financimit për këtë shërbim.
Përmes një reagimi në Facebook, Konushevci ka sqaruar se mbulimi i shpenzimeve për protezat e invalidëve të luftës së UÇK-së ka nisur në vitin 2023, ndërsa në dhjetor të vitit 2024 është zgjeruar edhe për invalidët civilë të luftës.
Ai ka theksuar se përfituesve u mbulohen 100 për qind e shpenzimeve dhe se, sipas informacioneve që ka, aktualisht nuk ka asnjë kërkesë për protezë në pritje të trajtimit.
“Deri më tani, të gjithë personave që kanë pasur nevojë për këtë shërbim, u janë mbuluar shpenzimet. Sipas informacioneve që kam, aktualisht asnjë kërkesë për protezë nuk është në pritje të trajtimit. Financimi i këtij shërbimi do të vazhdojë edhe në të ardhmen. Prandaj, është e rëndësishme të theksohet se mosmiratimi i një amendamenti për mjete shtesë buxhetore nuk nënkupton mungesë të financimit për protezat e invalidëve të luftës”, ka shkruar Konushevci.
Sipas Konushevcit, deri më tani kanë përfituar gjithsej 103 persona, me rimbursime të miratuara në vlerë prej 1 milion e 488 mijë e 631 eurosh.
Prej tyre, 58 janë invalidë të luftës së UÇK-së, të cilëve u janë miratuar rimbursime në vlerë prej 1 milion e 22 mijë e 570 eurosh, ndërsa 45 janë invalidë civilë të luftës, me rimbursime prej 466 mijë e 61 eurosh.
Konushevci ka thënë gjithashtu se financimi i këtij shërbimi është institucionalizuar përmes Fondit të Sigurimit të Detyrueshëm Shëndetësor dhe se mbështetja do të vazhdojë edhe në të ardhmen.
“Prandaj, është e rëndësishme të theksohet se mosmiratimi i një amendamenti për mjete shtesë buxhetore nuk nënkupton mungesë të financimit për protezat e invalidëve të luftës”, ka shkruar ai.
Duke komentuar debatin parlamentar për këtë çështje, Konushevci ka pretenduar se ajo është përdorur edhe për qëllime politike.
Ai ka kritikuar qasjen e disa përfaqësuesve opozitarë, duke thënë se çështja duhet të trajtohet me përgjegjësi institucionale dhe jo për përfitime politike apo vëmendje në rrjetet sociale.
Në fund, Konushevci ka theksuar se do të vazhdojë angazhimin për mbikëqyrjen e zbatimit të mekanizmit të financimit dhe për përmirësimin e trajtimit të kategorive të dala nga lufta.
“Invalidët e luftës dhe invalidët civilë të luftës meritojnë trajtim dinjitoz, mbështetje të vazhdueshme dhe informacion të saktë për të drejtat e tyre. Kjo çështje duhet të trajtohet me përgjegjësi institucionale, jo përmes deklarimeve që mund të krijojnë pasiguri te përfituesit”, ka përfunduar ai./teve1.info/
