Kryeministri i Shqipërisë, Edi Rama ka vendosur sërish karrige para Kryeministrisë, duke lënë mbi to edhe fletët për dialog me protestuesit.
Në një video të publikuar, Rama shihet duke rregulluar karriget, ndërsa thekson se pakënaqësitë dhe arsyet për të protestuar nuk mund ta justifikojnë dhunën.
Ai ka deklaruar se përpjekja e një dite më parë për dialog u pasua me veprime të dhunshme, pasi protestuesit refuzuan takimin dhe dëmtuan karriget e vendosura para godinës së Kryeministrisë.
“Dje, dialogu mori përgjigjen e dhunës. Sot dialogu është këtu përsëri”, ka deklaruar Rama, duke shtuar se ndaj personave që shkaktojnë dëme do të ketë masa ligjore dhe financiare.
“Kush shkatërron, do të paguajë. Shqipëria është e të gjithëve”, ka theksuar kreu i qeverisë shqiptare.
Një ditë më parë, Rama kishte vendosur po ashtu karrige dhe fletë për dialog, por protestuesit i kishin refuzuar, duke grisur letrat dhe përmbysur karriget./teve1.info/
