Kryeprokurori i Shtetit, Zejnulla Gashi, ka vizituar Prokurorinë e Apelit, Prokurorinë Speciale të Kosovës dhe Prokurorinë Themelore në Prishtinë, ku ka kërkuar rritjen e efikasitetit, profesionalizmit dhe forcimin e llogaridhënies në punën e prokurorive.
Sipas njoftimit, vizitat janë pjesë e një iniciative për të vizituar të gjitha prokuroritë në vend, me qëllim të dëgjimit të drejtpërdrejtë të prokurorëve lidhur me sfidat e përditshme, problemet me të cilat përballen dhe nevojat e tyre profesionale.
Gjatë takimeve, është diskutuar për identifikimin e vështirësive në punën e prokurorive dhe mundësitë për adresimin e tyre përmes zgjidhjeve institucionale.
Kryeprokurori Gashi, po ashtu, ka prezantuar veprimet e ndërmarra që nga emërimi i tij, duke vënë theksin te krijimi i mekanizmave për avancimin e cilësisë së punës dhe forcimin e integritetit të prokurorëve të shtetit.
Ai u ka ofruar mbështetje prokurorëve në ushtrimin e mandatit të tyre kushtetues dhe ligjor, me synim forcimin e sundimit të ligjit.
Në fund, Gashi ka kërkuar nga tri prokuroritë ngritjen e efikasitetit, profesionalizmit dhe llogaridhënies, si pjesë e përpjekjeve për përmirësimin e funksionimit të sistemit prokurorial në vend./teve1.info/
