Kryeministri i Republikës së Kosovës, Albin Kurti, ka pranuar një letër urimi për mandatin e ri nga kryeministri i Mbretërisë së Belgjikës, Bart De Wever.
Sipas njoftimit të Zyrës së Kryeministrit të Kosovës, De Wever ka vlerësuar marrëdhëniet e mira ndërmjet dy vendeve, duke theksuar se kontaktet politike dhe bashkëpunimi ndërmjet dy qeverive janë shtuar gjatë viteve të fundit.
Në letrën drejtuar Kurtit, kryeministri belg ka përmendur takimin e zhvilluar në New York në shtator të vitit të kaluar, si dhe vizitën në Prishtinë të ministrit të Punëve të Jashtme të Belgjikës, Maxime Prévot, në prill të këtij viti.
De Wever ka vlerësuar gjithashtu bashkëpunimin në fushën e policisë dhe gjyqësisë, si dhe përpjekjet e përbashkëta në luftën kundër krimit të organizuar.
Ai ka shprehur gatishmërinë për zgjerimin e mëtejshëm të bashkëpunimit ndërmjet dy vendeve, duke përfshirë fushën e mbrojtjes, sistemin e burgjeve dhe thellimin e lidhjeve ekonomike.
Në këtë drejtim, kryeministri belg ka theksuar edhe rëndësinë e lidhjeve të forta njerëzore të krijuara nga diaspora.
Letra e urimit dhe vlerësimet e kryeministrit belg janë bërë të ditura përmes njoftimit të Zyrës së Kryeministrit të Republikës së Kosovës.
