Ish-deputeti Gani Geci është dërguar në paraburgim për një muaj, me vendim të Gjykatës Themelore në Prishtinë, pas dyshimeve për kryerjen e veprës penale të kanosjes ndaj gazetarit Lirim Mehmetaj.
Vendimi është marrë sot, pas mbajtjes së seancës dëgjimore, ndërsa Geci ishte arrestuar në mesnatën e së hënës.
Gjykata Themelore në Prishtinë ka bërë të ditur se ka aprovuar kërkesën e Prokurorisë Themelore për caktimin e masës së paraburgimit ndaj të pandehurit, i cili dyshohet për veprën penale të kanosjes, sipas nenit 181, paragrafi 2, të Kodit Penal të Republikës së Kosovës.
“Gjyqtari i procedurës paraprake, pas mbajtjes së seancës dëgjimore, ka aprovuar kërkesën e Prokurorisë Themelore në Prishtinë për caktimin e masës së paraburgimit ndaj të pandehurit G.G., duke caktuar masën e paraburgimit në kohëzgjatje prej 1 (një) muaji”, thuhet në njoftimin e Gjykatës.
Sipas Gjykatës, masa e paraburgimit është caktuar për shkak të rrezikut që i pandehuri mund ta përsërisë veprën penale ose të ndërmarrë veprime për realizimin e kanosjes së pretenduar.
“Gjykata vlerëson se nëse i pandehuri lihet në liri pa masa të përshtatshme parandaluese, mund të tentojë të kontaktojë sërish të dëmtuarin L.M., të ushtrojë presion të mëtejshëm ndaj tij, përmes kanosjeve ose të ndërmarrë veprime për realizimin e kanosjes së pretenduar”, thuhet në komunikatën e Gjykatës.
Në arsyetimin e vendimit, Gjykata ka theksuar se ka marrë parasysh rrethanat në të cilat dyshohet se është kryer vepra penale, përmbajtjen dhe intensitetin e kërcënimeve, si dhe sjelljen e të pandehurit pas ngjarjes.
Po ashtu, Gjykata ka vlerësuar se masat alternative ndaj paraburgimit nuk do të ishin të mjaftueshme për të shmangur rrezikun e përsëritjes së veprës penale ose të realizimit të kanosjes së pretenduar.
Ndaj këtij vendimi, palët kanë të drejtë ankese në Gjykatën e Apelit të Kosovës.
Gani Geci dyshohet për veprën penale të kanosjes, ndërsa vendimi për paraburgim është masë e sigurisë gjatë procedurës penale dhe nuk përbën vendim përfundimtar mbi fajësinë e tij.
